ABU MAZEN ITERUM PRAESES

Palaestini eius potestatem confirmaverunt

Mahmud Abbas, nominatus Abu Mazen, quod cognomen pater Mazen valet, octoginta tres annos natus, rursus praeses Palaestinae et rector apparatus ad Palaestinam liberandam (OLP) a collegio exsecutorio consilii nationalis Palaestini electus est. Vicarius non nominatus est, aliqui autem in collegio exsecutorio quindecim virorum, in aliorum locum substituti sunt. Hic grex rei publicae Palestinensium fines statutos anno MCMLXVII obtinendos confirmavit, non excepta Hierusalem orientali capite. Idem collegium recusavit scilicet quod a praeside Trump decretum est, Hierusalem Israelis caput et sedem legationis esse. Immo publicae necessitudinis rationes cum nationibus ibi domus legatorum constituentibus intermissum iri. Civitates Americae Unitas iam non posse pacis interpretes fieri, sed consultatione inter nationes impulsu quinque virorum electorum Consilii Securitatis Ordinis Nationum Unitarum opus esse.

Quiddam novum ortum est de re politica Palaestina: tria subsellia etiam factioni Islamistae Hamas concessa sunt. Huc accedit quod, postquam electus est, holocaustum Hebraeorum declaraverit scelus historiae odiosissum, veniam petens de sententiis priore die Lunae expressis quibus adfirmaverat causam interitus Iudaeorum fenerationem et opera similia fuisse. Tamen excusatio ab Israele non accepta est cum ille praeter hoc aetate iuvenili thesin apud universitatem disputavisset qua exitium Hebraeorum negaret exstitisse simulque opus de hac re scripsisset.

Scripsit Lydia Ariminensis