Evanuit puella

GONE GIRL USA 2014

Regimen spectaculi: David Finch; scriptor scaenarum Gillian Flynn; histriones qui agunt primas partes: Ben Affleck, Rosamund Pike.

Opus filmicum dispositoris scaenarum David Finch pertinens ad genus mixtum, horribile simulque psycologicum et sociale, maximum plausum hoc tempore in orbe consequitur . In quo, sumpto a fabula scriptoris Gillian Flynn qui etiam scaenas scripsit, Ben Affleck histrio et Rosamund Pike artifex scaenica primas partes optime agunt.

Incipiente fabula, Nicolaus (Nick) manu flavas comas uxoris Amatae (Amy) permulcet nescitque quid ea sentiat. Re vera coniugium languescit, ut etiam pecunia. Cum ambo in opere fuissent diurnarii Novi Eboraci cumque ob discrimen oeconomicum exauctorati essent in civitatem Missouri recesserant ubi mater Nicolai aegrotans moritura erat. Vir, auxilio pecuniario uxoris, cum sorore thermopolio suo operam dare coeperat, sed olim domum rediens non Amatam invenit . A biocolytis in culina vestigia sanguinis detersi et in aedibus parentum ephemeris accusatoria subusta reperta sunt : paulatim vox populi et quaedam diurnaria a televisione eum cotidie de uxoris nece arguunt, quamvis scelus non probatum sit, carente corpore. Res privatae coniugum, etiamque viri adulterium, per instrumenta communicationis publicae fiunt, ita ut Nicolaus, cum omnibus odio sit, vitia se confitere et paenitentiam ostendere constituat.

Quid uxori evenerat? Non perierat: scaenam necis paraverat ad virum ulciscendum atque evanuerat . Veste et facie mutatis alibi vitam degebat, sed pecunia a furibus spoliata, in villam prioris amatoris confugit. Cum spectavisset maritum in exhibitione televisifica qui declararet , cum hoc ei usui esset, non se necavisse uxorem, immo eam amare ac paenituisse quod se infidum praebuisset, incensa iterum amore, hospitem iugulavit: tandem cruore respersa domum rediit velut si contra illatam iniuriam se defendisset. Qui autem exitus fabulae? Uterque in televisione et interreti personam falsae figurae a se creatam tenet , sed Nicolaus invitus, ab uxore coactus ac necessitati accomodatus , omnibus inspectantibus, se eam amare simulat.

Fabula, prope Hitchcockiana, spectatorum animos scilicet trahens, ad communem sententiam et commodam aptari sub discrimine oeconomico opus esse ostendit, quam magni momenti sit probitatis imaginem instrumentis communicationis vulgatam coram omnibus praebere.

Scripsit Lydia Ariminensis