Neapolis est …
 Neapolis est … Pino Daniele
Mortuo decem annis ante Maximo Troisi, novam
calamitatem urbs Neapolis accepit. Uterque Neapolis animum
finxit, alter pelliculis praesertim, alter cantibus, uterque,
heu!, corde laboravit.
Omnibus, non solum in Italia sed etiam in
orbe, admodum nota pellicula est, nomine “Tabellarius”
(Italice “Il Postino”) in qua modestus quidam
tabellarius (cuius partes Troisi agit, quem in media imagine
aspicis) amicitiam cum poeta Neruda (Philippe Noiret agit) exule
in Italia amicitiam contrahit. Cum maxime corde laboraret in
scaenis exprimendis, opus attamen perfecit. Eius in pelliculis
varii animi motus eminent: amicitia, familia, Neapolis civium
sollicitudines et pietas, timiditas. De Maximo Troisi quidam
dixit: aeterne adulescens, summo ingenio et cogitationis vi
praeditus, maestus, facile commovebatur.
In eiusdem pelliculis cantus adsunt, a Pino
Daniele (qui in imagine superiore canens ostenditur) compositi,
cuius vox singularis, tenuissima inter ceteros cantores eminet:
qui die IV mensis Januarii cordis ictu inopinate mortuus est.
Neapoli, natali urbi, (de qua dixit olim, Catulliano
more “amo et odi”) multos cantus dicavit; longe
notissimus est “Napule č” (Neapolis est
…). . Nonnullas strophas liceat describere:
Neapolis est mille colores,
Neapolis est mille timores,
Neapolis est puerorum voces
Quae lente extolluntur
Teque comitantur,
Neapolis est sol molestus,
Neapolis est maris suavis odor,
Neapolis est charta sordida
Idque neminem interest,
Neapolis est per angiporta
Cum aliquo deambulare,
Neapolis est totum somnium,
Hoc omnes in orbe noverunt …
 Non solum voce singulari
eminuit, sed etiam musica, quae genera varia commiscebat; una cum
Pino plures (externi quoque) concentus ediderunt, inter quos Bob
Marley, Ralph Towner, Yellow Jackets, Mike Mainieri, Danilo Rea,
Jovanotti, Eros Ramazzotti, Mel Collins, Chick Korea, Pat Metheny
…
Multa milia concivium in maxima Neapolis
platea cantum “Napule č” cecinerunt, quasi
vellent hoc modo postremum Pino Daniele salutem dicere.
Scripsit Domenicus Caveosanus
|
