EXPOSITIO UNIVERSALIS MEDIOLANI APERTA EST

Kalendis Maiis Expositio Universalis ad alimentum et victum spectans (Expo Milano 2015), quae usque ad diem XXXI mensis Augusti visitari poterit, Mediolani initium cepit. Nihil antea pari magnitudine de hac re apparatum est. Sex menses omnes nationes novas rationes et technologias ostendent praebituras cibos incorruptos, salutares, qui cunctis gentibus sufficere possint, adeo ut non tellus naturaeque status violentur.

Area expositionis undecies centena milia metrorum patet, CXL nationes et societates totius orbis huic eventui intersunt; circiter viginti miliones visitatorum exspectantur; iam undecim miliones tesserarum ad visitandum venierunt.

Non deerunt de re alimentaria opinionum commutationes, consilia pro omnium bono, incitamenta ad nova quaerenda quae in posterum orbis sustinere possit. Visitatores autem exquisitissimas totius orbis epulas libare poterunt; simulque musicae spectacula, conventus varii, laboratoria ad creandum apta, artium expositiones parata sunt.

Quid amplius? Atqui non ab omnibus hoc probatur. Id praesertim reprehenditur, quod maximi pecuniae praebitores ingentissima ergasteria Coca Cola et McDonald’s sunt. Grex extremistarum (black bloc) die initii inter reclamantes expositioni adversos inierunt ut omnia vastarent in viis mediae urbis Mediolani. Vestimentis nigris et personis adversus gasium induti, capite tegumento involuto, per duas horas, post meridiem, autocineta, capsas purgamentorum incenderunt, specularia tabernarum et argentariarum fregerunt. Contra biocolytas tela et ampullas Molotovianas coniecerunt. Postea relictis humi armis aliisque rebus celeriter se veste nigra exuerunt ut turbae immiscerentur. Insequenti die cives Mediolanenses magna diligentia omnia ut potuerunt expurgaverunt et ordine disposuerunt.

Scripsit Lydia Ariminensis