In Carolina meridiana, una ex Civitatibus Unitis Americae, custos publicus colore albo caedis accusatus est, quod hominem Afroamericanum fugientem glandibus necavisset. Quae res ex taenia visifica apparet a teste quodam iudicibus data. Cuius taeniae photographemata deinde in publicum prolata sunt. Custos ille, cum vehiculum sustinuisset, rixa orta hominem fugientem atque inermem pluribus glandibus percussisse videtur. Deinde humi iacenti manicas imposuit.

Nuntiatum est Afroamericanum propter lucernulam defectam retentum esse. Frater eius, cum taeniae auctorem ut virum fortem laudasset, „quomodo cognoscamus“, inquit, „quid sit verum, nisi hac taenia facta? Nunc autem scimus, quid verum sit.“Custos publicus, vir XXXIII annorum, dixit se vitae suae timuisse, cum Afroamericanus telum sibi eripuisset, quo per vim electronicam torpor efficeretur. Sed ex taenia visifica supra dicta apparere videtur illum hoc instrumentum mortuo supposuisse. Custodi, si caedis damnatur, supplicium imminet. In tanto discrimine nescio an hoc casu res ingravescant, cum saepius nuperrime factum sit, ut custodes colore albo Afroamericanos necaverint. Fergusone, in civitate Missouri, tumultus complurium dierum exorti sunt, cum adulescens Afroamericanus a custode publico glandibus ictus esset.

Scripsit Volfgangus Austriacus