Israëlem pecuniam detinere

Regimen Israëlianum detinere constituit 500 milions shekelium, id est circiter X centena milia euronum, quae sunt vectigalia mense Decembri accepta Auctoritati Palaestinensi transferenda iuxta antiquam pactionem: ipse minister primarius Beniaminus Netanyahu particeps fuit consilii, postquam vulgatus est nuntius Auctoritatem Nationalem Palaestinensem ultimo anni MMXIV die subscripsisse Foedus Romae, ut ad Tribunal Poenarium Mundanum adire posset: "Unde - ait minister rerum exterarum Avigdor Liebermann (qui in imagine adposita ostenditur) - decidunt pactiones Asloae subscriptae." Quae pactiones, favente praesidente Civitatum Americae Unitarum, summus fuerunt conatus pacis inter duos populos restituendae. Ipse Avigdor vehementer reprehendit homines politicos Europaeos necnon senatus Suetiae et Hiberniae, qui deliberaverunt Palaestinam ut rem publicam agnoscendam esse, mendacii eos accusans et adfirmans posthac Israëlem ab Europaeis derelictum esse.

Auctoritas Palaestinensis respondet pecuniam detentam novum crimen bellicum esse, dicens petitionem a se subcriptam eo contendere, ut sine vi neque cruore effuso ius populi Palaestinensis defendatur; propter similem causam iam mense Aprili praeterito idem iam fecerat regimen Israëlianum.

Scripsit Herimannus Novocomensis