MINAE ATOMICAE

Vladimirus Putin contra hostes regni Chalifi missilia, quae a navigio subaquaneo Rostov in mari Medio posito profecta sunt, obiecta esse confirmavit ac pervicaciter rem subtilius explicavit: illa instrui posse cum capite usitato vel proprio, videlicet nucleari. Sed in territores armis atomicis uti non necesse. Statim autem dux Russicus non bona verba, immo metuenda, adiecit: se sperare numquam ea tempore postero necessaria fore.

Ut ait Sergius Shoigu Minister Russicus publicae defensioni praepositus, contra duo propugnacula circum Raqqa, caput regni Chalifi, missilia eiecta esse; satis detrimenti armorum receptaculo et petrolei substructionibus illatum esse. De incursu Russia Civitates Americae Unitas edocuit. “Hoc magni aestimatum est” relator Pentagoni Petrus Cook denuntiavit, cum admonuisset ut oporteret Russicos ex foedere pacto ad vitanda in coelis Syriacis proelia nuntium de petitione afferre. “Re vera – inquit rector Pentagoni Ash Carter – in statu belli sumus” . Non satis agendum esse ut vires Chalifi continerentur. Tamen non sibi videretur copias terrestres in Iraquia et Syria augeri, ne bellum tantum Americanum fieret.

Scripsit Lydia Ariminensis