CATALAUNIA LIBERTATEM PETIT

Catalaunia solutam ab Hispania cupit se esse. Nuperrime Senatus Barcinonis rogationem de adipiscenda libertate plerorumque suffragiis probavit; quod accidit postquam mense Septembri fautores secessionis superiores de comitiis regionis exstiterunt; tamen legati populares recusantes Hispanum vexillum sustulerunt. Incipietne vera secessio? Etenim faventes obnoxietati abolendae sibi proponunt Hispaniam Unitam solvere ut novam rem publicam Catalaunam condant. Paulatim iussis legibus loci nova instituta rei publicae suis iuribus, ut secessionis studiosi existimant, creabuntur. Quod videlicet legibus Hispanis obstat, praesertim Chartae Constitutivae anno MCMLXXVIII ratae etiamque Tribunalis Constitutionis sententiis quod non legitimum pars Catalaunorum declaravit, cum priore anno comitia de libertate indicta ab iis essent , sed non ab eodem probata.

Minister Primarius Marianus Rajoy appellationem ad idem Tribunal Supremum paraturus est ad rogationem abrogandam: Madritum contra Barcinonem legitime ac populariter contendet ut Catalaunia in Hispania maneat. Omnes factiones variis vocibus suffragium Catalanum reprehenderunt et antidemocraticum appellaverunt. Mortuo Francisco Franco, probata nova Charta Constitutionis, Catalaunia, ut aliae civitates intra Hispaniam, quadam autonomia locali fruitur, sed ad maximam libertatem tendit.

Scripsit Lydia Ariminensis