Princeps factionis Hamas comprehensus est

Phylarchus Hassan Yusef dominator partium Hamas, qui vir “imago” factionis extremae Palaestinorum existimatur, priore nocte in oppido Ramallah, in Cisiordania, ab exercitu Israelis in custodiam datus est. Ille, ut ait exercitus relator Petrus Lener tribunus militum vicarius, ad tromocratiam excitavit. Comprehensionem sine difficultate effectam esse. Ducibus factionis non credendum esse se concedere ut ab illis vis et tremor foverentur e commodis atriolis et meschitarum suggestis loquentibus.

Phylarchus, sexaginta annorum aetate, saepe a militibus Israelis comprehensus est ob suum multae dignitatis statum inter factionis sectatores a quibus alae pragmaticae fautor reputatur. Non multo ante e carcere mense Iulio huius anni dimissus erat, post annum detentionis securitatis nationalis causa.

Nova comprehensio facta est post undam ingentem violentiae immissam quae a Kalendis Octobribus regionem invasit, qua VIII Israeliani, unus migrans Erythraeus, unus Arabicus civis Israelis e XLIII Palaestini perierunt.

Clam autem Hamas ad rebellionem Palaestinos excitavit: ab oppido Gaza principes partium Cisiordaniae incolas ut pugnarent in Israelem, tertia seditione accensa, hortati sunt.

Scripsit Lydia Ariminensis