AUTOCINETUM CAIRI DISPLOSUM EST

Primo mane priore die Saturni autocinetum pyrobolo dolose instructum, ante legationis Italicae sedem, Cairi, in capite Aegyptio displosum est: duo perierunt, decem saltem, inter quos duo biocolytae, sauciati sunt, nullo Italiae cive leso. Tres vulnerati graviter laborant. Diruptio detrimentum aedificii fronti etiamque nonnullis domibus finitimis attulit. Post aliquot horas tromocratae Chalifi (ISIS) incursum contra rem publicam Italicam in pagina breviloquenti (Twitter) fautrici sibi vindicaverunt. Novae petitiones timentur. A quodam Securitati Aegyptiae addicto autoraedam ante aedificium legationis statutam esse vulgatum est; illam directione e longinquo displosam esse, non per volontarium sui interemptorem (kamikaze), quod primum latum esse. Sive Praeses Italicus sive Pontifex Franciscus indignati petitionem tromocraticam vehementer damnaverunt. Minister Primarius Matthaeus Renzi telephonice cum Praeside Aegypti Abd al-Fattah al-Sisi collocutus est. Italiam et Aegyptum concordes adversus territores omni tempore pugnaturos esse.

CCL kiliogrammata trinitrotoli ad pyrobolum conficiendum adhibita sunt, qua materia actor publicus princeps, Hisham Barakat, ante unam septimanam necatus est. Iudex Ahmed al Fuddaly, fautor Praesidis, tromocratas re vera se voluisse occidere declaravit, qui paulo ante diruptionem illac transisset, cum sedes iudicialis non longe a legationis aedificio esset. Dum autocinetum disploditur, se circiter CC metra ab illo abesse.

Scripsit Lydia Ariminensis