Quare Graeci die Solis suffragium inierunt? Usque ad extremum triplex auctoritas Europaea (Troika) colloquiis et negotiis plebis scitum vitare temptavit, sed frustra verba consumpta sunt. Populus Graecus sententiam de oeconomica ratione a Praeside Consilii Europaei Ioanne-Claudio Juncker proposita pro novo auxilio pecuniario hodie tulerunt : ex qua constitutum est tributa beneficia graviter minuenda , emendatione vectigalium et tributorum opus esse, sumptum militum levare, ad privatam administrationem societatum publicarum translationes conficere , operas fovere et augere rei oeconomicae statum, immunitates tollendas esse.

Utraque factio priore die Veneris vespere se congregavit ad reclamandum; pars Europae adversa in Forum Constitutionis, ubi vehemens oratio a Ministro Primario Alexi Tsipras habita est, altera favens in Stadium Panathenaicum convenit. Ante duplicem conventum proelia inter biocolytas et reclamantes exarserunt.

Pridie plebiscitum neutra pars victrix sine dubio reputabatur. Sero vespere novissimis nuntiis vulgatis constat factionem recusantem Europam vicisse. "Imperium populare non minis cogi potest" ait nuper Alexis Tsipras . Sed die Lunae pecunia in argentariis Graecis iam deerit. Nisi auxilium pecuniarium praebitum erit, Graecia decoquet et amisso euronummo ad drachmam redibit.