Annus
2 0 1 5


DE COMITIIS IN TURCIA HABITIS

DE COMITIIS IN TURCIA HABITIS

Primum in comitiis in incerto erat an Praeses Turcarum Recep Tayyip Erdogan (in photographemate supra) suis partibus tantum nixus posthac rem publicam administrare posset. Factio Curdarum (Hdp), cuius princeps Selahattin Demartis “Obama Curda” nominatus est, saltem LX fere subselliis captis ex DL, ut videtur, impediet ne Charta Constitutiva commutetur neve dominatus unius praesidis imponatur.

LIV milliones Turcarum qui ius suffragii habent vicesimae quintae legislationis ab anno MCMXXIII legatos populares elegerunt; XX factiones ac CLXVI petitores partibus soluti inter se certaverunt ut finem decimae suffragiorum partis superarent. Aliae non deerant factiones qui numerum necessarium capere possent: praeter duas de qua dictum est, etiam partes populares (Chp) et dexterae patriae fautrices (Mhp).

Comitia magno timore habita sunt postquam die Veneris praeterito territorum petitio adversus comitium factionis Curdae facta erat. Qua re quater centena milia biocolytarum munus obierunt ubique Turciae ut tumultus vitarentur.

Novissimis nuntiis latis, iam prope omnibus suffragiis computatis, Erdogan non tot subsellia cepit ut solus gubernaret. Factio Curdarum in senatu legatos electos habet.

Scripsit Lydia Ariminensis



Retro ad:

Novissima editio
Summum paginae