PALMYRA IN POTESTATEM JIHADISTARUM VENIT

Militantes Chalifi nuper antiquissimam urbem Palmyram ceperunt, ubi eximia maximi momenti monumenta supersunt, praesertim cum Patrimonium humani generis ab Ordine Nationum Unitarum pro disciplina scientia et humanitate (UNESCO) declarata sint; cuius rectrix Irina Bokova denuntiavit iam aliquid deletum esse, nonnullas columnas Palmyrenas cecidisse. Post reliquias apud Hatra et Minrud in Iraquia dirutas periculum est ne etiam Palmyrae, quae “Venetia in sabulo” nominatur, idem fiat. E nuntiis in totum orbem vulgatis pugnantes Chaliphi Abu Bakr al-Baghdadi territorium ab urbe Damasco ducenta kiliometra absens occupaverunt. Cum centum saltem milites administrationis Syrianae recedentes occisi essent, iam maior quam dimidia Syriae pars in potestatem Jihadistarum redacta est.

Vera oasis archaeologica in desertis Palmyra a peritis reputatur, cum in antiquo praeclaram studiorum sedem fuisse constet ad quam triplex cultus humanus civilisque Graecorum, Romanorum et Persarum confluxerit. Eius mentio saepe facta est in antiquissimis archivis urbis Mesopotamiae Mari abhinc IV milia annorum conditae. Primo saeculo p.Ch.n. in dicionem Romanorum cecidit eiusque pondus auxit, cum maximum emporium negotiatorum ab India, Sina et Persia advenientium esset. Corrupto Romanorum imperio in potestatem Arabum redacta est paulatimque concidit. Inter praeclara monumenta templum dei Baal, castrum Diocletiani, forum et theatrum digna memoratu permanent.

Novissimis nuntiis latis exercitus Syrianus pugnam renovatam paravisse fertur, cum magna caedes patrata a Jihadistis sit, qui autem civiles etiamque feminas captos in loca ignota transtulerint.

Scripsit Lydia Ariminensis