DAVID CAMERON VICTOR DISCESSIT IN COMITIIS

David Cameron ovans in comitiis Anglicis maximo numero suffragiorum victor evasit iterumque per novum quinquennium Minister Primarius electus est; nam factio conservativa ceteras longe devicit numero tot sellarum ut sola gubernare possit id est CCCXXXI ex DCL. Laboristae magnam cladem acceperunt, sed in Scotia qui volunt suis iuribus vivere prope omnia subsellia LVI ex LIX ceperunt.

Cameron, munere a Regina accepto, coram populo locutus est . Ad illud tempus suam administrationem optime operam explevisse actis fundamentis, sed posthac quiddam novi super illa aedificandum esse. Se intra biennium de exitu ab Unione Europaea plebis scitum edicturum esse.

Non defuerunt reclamationes adversus factionis conservativae victoriam in media urbe Londinio, praesertim ante sedem Ministri Primarii uxorisque ampullis, vasculis metallicis, substantiis fumiferis coniectis, muris graphiis inscriptis. V biocolytae sauciati sunt, XVII reclamantes comprehensi .

Scripsit Lydia Ariminensis