Quisnam sepultus est ...

... in sepulcri monumento apud Amphipolim reperto ? (i)

Qui historiam antiquam diligunt ac norunt, secum nempe cogitant quisnam sepultus sit intra solidos lapideosque muros magni sepulcri apud Kastam positi, in Graecia Septentrionali, non longe ab urbe Amphipoli a quo portu classis Macedonum profecta est incepitque expeditio in Asiam : nonne Alexander Magnus, cuius monumentum ferale tot periti archaeologiae frustra petiverint?

Post biennium quo circa tumulum effossum est archaeologi cubicula intus explorare coeperunt. Ante duos menses periti ductu rectricis Katharinae Peristeri duas karyatides inventas esse declaraverunt, id est statuae velut columnae specie feminarum sed, quod mirum est, brachiis expansis, quasi introeuntes arcerent. Non solum karyatides sepulcrum ornant, sed etiam leo, imperii Alexandrini imago. Ad hoc duae Sphinges sunt portae custodes, velut aenigmatis signa: ad quem sepeliendum huiusmodi Mausoleum ex lapide Thasio cui quingenta metra sunt in circuito, octoginta septem diametri et tria in altitudinem abhinc duo milia et trecentos annos tanta magnificentia exstructum est? In vestibulo venusta stratura polita ex marmore albo rubro colore tessellato etiamque pictura muralis magnae opulentiae indices videntur: quae revocant operum musivorum luxuriam regiae Pellae, ubi Alexander natus est.

Decies tantum est quantum sepulcrum existimatum Philippi, Alexandri Magni patris, apud Berginam situm. Dubium non est quin pro rege vel regia familia aedificatum sit paulo post Alexandri obitum. Tamen haud verisimile est hic Alexandrum sepultum esse. Nam rerum scriptores tradunt eum interisse febri palustri vel typho aegrotantem anno CCCXXIII a.Ch.n.; deinde corpus melle integrum servatum in Macedoniam versus translatum est, sed unus ducum Ptolemaeus narratur id surripuisse in Aegyptum laturus. Sunt autem qui putent in Mausoleo unum familiae conditum esse: vel Olympiam matrem vel Roxanem uxorem vel filiolum cui idem nomen ac patris fuerat: omnes propinqui ab alio duce Alexandri, regni cupido, necati sunt.

Scripsit Lydia Ariminensis