Uno die duas victorias Italia consecuta est

Birotista Nibali Gallicum circuitum fulva tunicula indutus confecit, id quod effecit ut “Gallorum testes se torquerent”, sicuti de birotista Italico Bartali, multis ante annis victore in Gallico circuitu, clarissimus cantor Paulus Comes musica dixit. Nibali, qui in Sicilia “birotare” coepit, in Tuscia ad maturitatem pervenit. Animo a parentibus, a familia et ab amicis confirmatus, humilis et purus, summa diligentia se exercuit ut felices exitus consequeretur.

Navis “Concordia” (cuius Schettini gubernatoris ignominiosum facinus liceat silentio praeterire) feliciter ab insula Igilio usque ad Genuae portum, ubi disicienda erit, tracta est. Multi (operarii, periti non solum Italici), cum naufragium evenisset, omnibus operibus interfuerunt, quare variorum sed peritorum hominum concordia, etsi difficillima res erat, felicem exitum effecit… etsi “mors tua vita mea” de “Concordia” casu adfirmari potest; quamdiu enim navis, partim submersa et balaenae similis in ora iacenti, prope Igilium insulam fuit, praeter operarios et peritos operibus variis traditos, in insulam cotidie hominum multitudo accurrebant, navem inspiciendi cupiditate allecti; id quod insulae oeconomica negotia iuvavit. Genuae quoque inspiciendi cupiditas patefacta est; dominici peregrinatores, photograficis instrumentis praediti, accurrerunt: saepe calamitates eorum malam curiositatem movent, qui ab iisdem afuerunt. Per duos annos multa milia operariorum operam dabunt; id quod hoc tempore, quo inopia regnat, maximi momenti est.

Scripsit Dominicus Caveosanus