Annus
2 0 1 4


ASINAE “

Asinae "oecologicae"

In parva Siciliae urbe, nomine Castrobono (italice Castelbuono), prope Panormum sita, primum in Italia asinae, cuius generis perpaucae exstant, ad reiectiones separatim et ostiatim colligendas adhibentur, id quod decreverunt administratores et praefectus urbis, civibus summo studio et alacritate consentientibus.

Quercus, fraxini ceteraeque arbores in valle viridentes urbem circumdant, in qua circiter IX milia civium vivunt; eorum maxime interest aeris salubritatem servare et visitatores allicere. Ibi autocurrus angustas vias non percurrunt neque eas maximo fragore foetoreque emplent. Asinae autem, quae observantia coluntur, lento gradu, sedulae, silentes (…aliquando, cum vivae sint, voces mittunt, … re vera non solum voces) munere funguntur.Reiectiones a civibus percipiunt operarii quidam, qui alcool aliisque rebus veneficis antea laboraverunt, ii quoque qui aliquo modo inhabiles corpore aut mente sunt. Hi omnes dignitatem et consuetudines servare coeperunt. Cibi reiectiones in feracem fimum mutantur, qui civibus postea dispensatur. Cui prodest hoc? Aëris salubritati, civibus illis qui in labore dignitatem servant, urbis pecuniarum rationi et … asinarum generi, quod exstingui periclitabatur. Aliis Italiae urbibus exemplo sit quod in parva Siciliae urbe factum est!

Hoc fore exoptant Castroboni cives et … asinae sedulae.

Scripsit Dominicus Caveosanus



Retro ad:

Novissima editio
Summum paginae