In Auschwitz,
In Auschwitz, ubi Deus quoque tacuit
Haec verba saepe in silentio maeste clamaverunt qui ex
holocausto vivi redierunt sed animo paene mortui; vivere
perrexerunt hac re tantum impulsi, ut iuvenes de horrendis
facinoribus quae intolerantia creavit docerent.
Diebus nuper praeteritis Dies Memoriae in Italia
celebratus est. Summopere animos movit tristissimus cuiusdam
mulieris casus, nomine Verae Vigevani Jarach.
In urbe Mediolano vivebat
cum, legibus contra judaeos promulgatis, Vera (quae in
imagine suprema effingitur) a schola exspulsa est; parentes
constituerunt in Argentinam migrare. Avus maternus (in
imagine in medio posita effictus) autem in Helvetiam
confugere conatus est sed frustra: apud fines detectus et captus,
in Auschwitz deportatus est, ubi paulo post vapore venefico
occisus et inde in crematorio exustus est.
Mors, nondum satiata, imminebat. Videlae
militari dominatione imperante, Verae filia Franca nomine et
XVIII annos nata, (quam pone aspicis) quae pro libertate
pugnabat, subito evanuit. Viginti annos post Vera veritatem
detexit: filiam a militibus raptam, in carcerem coniectam et
excruciatam, veneficis liquoribus sopitam, postremo in mare ex
aeromobili deiectam esse. Militari dominatione
praeterita, Vera ceteraeque matres, quibus liberi erepti erant,
in Plaza de Mayo se congregaverunt nec umquam desinunt
clamantes quaerere Ubinam liberi nostri sunt?
Multi modo nati e matribus erepti aliis
parentibus traditi sunt. Plaza de Mayo Matres
investigant ut liberi rapti detegantur et ad matres naturales
redire possint.
Scripsit Dominicus Caveosanus
|