Unio Europaea legi agrariae Hungarorum intercedit

Collegium commissariorum Unionis Europaeae, cum de pactione ab Hungaris laesa agunt, in causam legis agrariae ingrediuntur, quod Hungari ea lege usufructuariorum externorum iura minuerint. Quod praeter ceteros ad agricolas Austriacos pertinebat, qui plus L milia iugerum soli Hungarici colerent.

Commissarii Hungaros monuerunt, ut intra duos menses ad interrogata sua responderent. Sibi esse persuasum leges Hungaricas iuri commercii libertatique sedis collocandae repugnare. Cum Hungari mense Decembri anno MMXIII lege constituissent, ne peregrini usum fructumque ultra mensem Aprilem anni sequentis haberent, iura eorum minui, qui pecuniam in agro colendo collocassent. Eandem legem praeterea esse vituperandam, quod conductiones, quas peregrini plus viginti annos haberent, nullo fere spatio intermisso renuntiari possent.

Cum anno MCMXCIV peregrini vetiti essent solum Hungaricum emere, ad annum MMI res ita contrahebantur, ut domini Hungari colonis externis agrum in usum XCIX annorum permitterent. Quid mirum, quod usufructuarii, cum mercedem tot annorum iam solverint, de pactione publice renuntiata indignantur?

Scripsit Volfgangus Austriacus