Simulacrum per Europam vagatur

Non communismus (sicuti Marx in Libello Partis Communisticae scripsit) sed Europa, comitiis gestis, per Europam vagatur, quasi mater sauciata flens, a multis liberis fastidiata atque paene contempta-

Secundo bello totius orbis confecto constat nonnullas nationes costituisse “parvam Europam” condere, oeconomicam plerumque. Crevit annis transeutibus “puellula” sed non tantum ut matura fieret et magna auctoritate valeret, quin etiam nonnulli liberi a matre genitrice discedere coeperunt: quisque pro domo sua et domi suae!

Unus euronummus non amplius liberos coniungit, quorum vita, modus administrandi atque vivendi varii fuerunt et sunt, etsi historia, aliquando tragica, in fatum commune tempore praeterito eos mersit. Oeconomicus terrae motus, a Rebus Publicis Unitis Americae profectus, magis magisque discrimina auxit inter liberos opulentos et liberos qui causis variis in angustiis vivunt; horum domi in matrem Europam et in fratres opulentos (Alemannos plerumque) animus infensus crevit, qui in novissimis comitiis patefactus est. Paene in omnibus nationibus enim numerus eorum augescit, qui domum communem aut nummum communem deserere exoptant (“Delenda Europa!”, “Delendus Euronummus!”); sunt autem qui optant Europam non solum in recte administrando sed etiam in operibus creandis operam esse daturam (id quod antea non fecit). Inopia enim eos impellit, qui operam amittunt aut sine opera sunt, ad desperationem, ad odium in Europam, in externos, in Judaeos (Shoà nihil docuisse videtur!), in finitimos, in Musulmanos, in migrantes …; saeptum magis magisque angustus fieri videtur. Nota sunt verba quibus in Italia contra cives meridionales voce rauca Bossi Princeps Ligae Septentrionalis, clamavit “Extra sphaeras (id est testes) eant!”; verbis similibus alii eiusdem Partis in Musulmanos eorumque mores usi sunt.

Europa dissociata et discors quanti est, cui prodest?

Sine dubio una est Europa sed eius est, quasi mater benevola sit, omnibus liberis providere, iis maxime quibus auxilio opus est.

Hoc tempore vivimus quo totius orbis oeconomica studia conexa sunt (Anglice globalization); singulis nationibus operibus, concordia, communi voluntate opus est. Haec omnia Europae magnam vim et politica et oeconomica ratione conferant.

Europa se ipsam et totam magis amet! Eius detrectatores (Le Pen in Gallia, Grillus et Salvini in Italia, Forges in Anglia, nazistae, xenophobi …) singulas nationes exoptant in suos “fines” et nummos, Europa communi deserta, in statum quo antea reverti; magna voce haec clamant et variis recusationibus pro se utuntur.

Non prevalebunt si Europae nationes et magis consciae Partes non solum euronummi rationem habebunt sed etiam, plerumque, eorum civium qui egestate aut operum inopia laborant. Haec Europa patria communis sit!

Scripsit Dominicus Caveosanus