Lusitania a custodibus nummariis liberatur...

... immani pretio soluto.

Res publica Lusitaniae, quae anno MMXI versuram fecerat a Triade, id est ab Unione Europaea, Argentaria Media Europaea et Argentaria Universali, feliciter exit ex assidua vigilantia creditorum. Duodeoctoginta miliardis euronum ante annos tres acceptis, gubernatores adeo et magistratuum et omnium, qui munere publico funguntur, numerum et mercedes deminuerunt, tempus operae dicatum adauxerunt, ut creditorum postulatis satisfacerent et fidem fororum mercatorium sibi recuperarent.

Minister primarius conservativus Petrus Passos Coelho ob prosperum exitum laetus, cuius gratia sibi inimicitiam comparavit non solum factionum sinistrarum, sed etiam sodalitatum operariorum et militum "longum est adhuc iter - inquit - donec ex discrimine oeconomico certe et definite egrediamur! Posthac gubernatorum consilium illud est, ut operae et divitiae adaugeantur." Etiam praesidens Collegii Europaei Josephus Emmanuel Barroso, Olisopone ortus, plaudit felici exitui et Lusitaniae et Unionis.

Interea septimus quisque Lusitanus opera caret, scholis, universitatibus et nosocomiis minus pecuniae destinatur, agricolae olivum tanti venditandum efferunt ut emptores Americani tantum id emere queant, pauperum et aegrotorum numerus increscit.

Scripsit Herimannus Novocomensis