De conubio homosexuali a societatibus adiuto

Sequenturne hominum sexu parium diem nuptialem multi reditus felices anniversarii in Civitate Utensi? Multae enim societates quaestui habitae iudicio foederali recenter argumentum prodiderunt, se cum causa sociantes ut homosexualium matrimonium Civitate Utensi fingatur. Ea causa adversatur Constitutionis Utensis partem qua tantum ex coniugio inter virum et feminam legitimo matrimonium consistere affirmatur. Nam comitiis anno 2004 habitis 593 milia Utensium eam partem inici aientium in 307 milia negantium valde exundaverunt.

Civitatis Utensis patronus primarius causam popularem procurat et opinionem exhibuit quod liberis conubium homosexuale nocet. Videlicet dissentiunt socii petitorum. Quorum libertates Constitutione Civitatum Unitarum donatas violatas fuisse judex foederalis mense Decembri anni 2013 decrevit, hactenus irritam legem Utensem faciens. Civitas Utensis ad iudicium appellationis foederale provocat.

Contra Utae appellationem 46 societates quaestui habitae una prodiderunt, quarum extra Utam notissimis insunt Facebook eBay Starbucks Google et Overstock. Haec cum praeside suo Patricio Byrne sumptum in coniunctim proditum impendit, et copraesidens Procellosa (Stormy) Simon dixit, quia officina arcui pluvio amica est Overstock idque decori habemus. Ipsarum cunctarum societatum opinio est quia Uta conubium homosexuale repudiante difficultas infligitur operarios habilitate valentes ad ipsas alliciendi. Quae rentur quibusdam Civitatum legibus multos operarios, vel eorum heterosexualium sic dictorum, deterreri ne in aliquibus locorum incolant ubi ipsae negotium gerunt aut gerere volunt.

Illis autem societatibus quaestui habitis aptum, quarum principes conubium homosexuale repudiant, videtur par argumentum ad Civitates coniugia homosexualia legibus sancientes attinens. Et inter eos se homosexuales gloriantes quoque sunt qui ipsorum ambitum facultate nuptiarum homosexualium carere optant.

Denverii in Colorato Civitate argumenta de illa appellatione tribunali foederali 10 Apr. 2014 coram cognoscentur.

Scripsit Thomas Davis