De cruore in meschita effuso

Nondum coeperat orationem enuntiare dux spiritualis, cum autoraeda in meschitam invecta, cui fideles ibi collecti obstiterunt, vehementer displosa est, atque extrinsecus pervenerunt sclopetatores viros orationi intentis adgredientes: CXX victimae computantur adhuc et CCLXX sauciati Kanone, in urbe Nigeriae septentrionalis; Mahometus Sanusis, qui Kanonis Muslimis praeest, populum recenter adhortatus erat ut armis destrictis contra gregem Boko Haram resisteret, qui hoc singulo anno anno iam MM homines in Nigeria interfecisset ut inhumane rigida lex Islamica praevaleret. Ergo putant speculatores gregem illum reum hodierni facinoris scelesti.

Post plurimos impetus ruri perpetratos, Boko Haram in urbes Nigerianas saepius incursat non solum in Christianos sed etiam in Muslimos, quam ob rem exercitui regulari aliter in saevos tromacratas adversandum est, ut fides populi parumper restituatur et rei publicae periculum avertatur.

Scripsit Herimannus Novocomensis