Annus
2 0 1 4


Novi Eboraci horti publici.

Novi Eboraci horti publici...

... dormitoria facti sunt.

Numerus eorum qui sine domicilio miserrimam vitam degunt Novi Eboraci maxime auctus est. Carruli sarcinulis vehendis plerumque ante magna emporia insulae Manhattan non inveniuntur: cotidie milia auferuntur saccis plasticis omnibus rebus necessariis onusta et praesertim vasculis metallicis ad usum iteratum aptis: haec sunt bona miserrimis, inter purgamenta collecta. Quo more solito ducuntur? Ad hortorum sedilia: sua cuique domus sub caelo est.

Forum nummorum Viae Muri (Wall Street) rursus viget sed pauperrimorum numerus magis magisque augescit. Uno die MMMCCCLVII computati sunt, sed adiunctis dormientibus nocte in hospitiis in summa circiter sexaginta milia sunt domicilii egentium qui non solum insulam Manhattan, sed etiam vicos Bronx, Brooklyn, Queens incolunt. Quod obstat ne cives cum pueris in hortos se conferant cum subsellia praeoccupata sint atque occupata toto die maneant; vacua autem excrementis foeda plerumque ostenduntur. Syndici Giuliani et Bloomberg qui antea fuerunt effecerunt ut homines sine tecto e media parte Novi Eboraci amoverentur, sed pars illic ubi alimenta cotidiana dispertiuntur permanet. Syndicus De Blasio sanxit ut mane ex sedilibus excederent, sed frustra. Plurimi non imperium observare solent, immo etiam culcitas chartae crassioris ponunt inter subsellia ita ut in castra hortos toto die mutent. Etiam ceteri horti publici male olentia tabernacula facti sunt. Custodes publici quid agant cum incerti sint minitati sunt se sedilia ablaturos esse.

Scripsit Lydia Ariminensis



Retro ad:

Novissima editio
Summum paginae