Annus
2 0 1 4


De fenore Europaeo ad minimum redacto

De fenore Europaeo ad minimum redacto

Marius Draghi, Gubernator Argentariae Primariae Europaeae (BCE) ante triduum foenus nuntiavit ad minimum redactum esse (a 0,15% ad 0,05%): impensam mutuae pecuniae minimi pretii quam fieri possit esse; simulque eandem argentariam mox syngraphas et titulos pecuniarios (covered bond, Asset backed securities) tutos, non ambiguos, empturam esse.

Hoc effectum est quod auctus modus eurinummi areae pro exspectatione inferior est. Quid statim consecutum est? Pretium mutationis euronummi in dollarium ad minimum in anni spatio descendit, (1,3036) cum negotia in foris nummorum Europae valde augerentur et magna lucra, praesertim Mediolani, efficerentur.

Sed ipse Gubernator affirmavit id non satis esse ut in melius res mutaretur, immo singulis admistrationibus multa emendanda esse ut incremento oeconomico et operis faveretur. In hoc discrimine nummorum inflationis deminutio vitanda est. Nam si bona et operae minus requiruntur ob civium inopiam, pretia sed etiam quaestus minuunt: qua re ergolabi non ergasteria nec opera mercatoria suscipiunt; sic oeconomia et amplius concidit. Omni ratione opus sustentare oportet.

Scripsit Lydia Ariminensis



Retro ad:

Novissima editio
Summum paginae