De Caliphae oratione

Abu Bakr al Baghdadi, qui sese nuper renuntiavit Calipham Rei Publicae Islamicae, quae partem Iraquiae partemque Syriae occupavit, primum publice contionem habuit apud ignotam meschitam Mossuliae, urbis Iraquiae septentrionalis ab armatis Sunnitis mense praeterito expugnatae: nuntius per retia mundana divulgatus est.

Nigra tunica indutus, nigrum tiaram capite gerens, in excelso pulpito sculpturis decoro stans, primum versus Coranicos concinit et tempus Ramadanicum extulit, deinde fidei pugnatores hortatus est, ut officio suo in Dei via fungantur ad Caliphae dominatum pronuntiandum; denique infideles et hypocritas admonuit, victorias Muslimorum in toto orbe extollens.

Abhinc paucos dies Calipha fideles hortatus erat, ut undique in Rem Publicam Islamicam se congregarent ad Romam expugnandam.

Al Baghdadi simillimus visus est descriptioni ab investigatoribus Americanis effictae.

Scripsit Herimannus Novocomensis