De cruore in Iraquia effuso

In re publica Iraquena multae militum captivorum decades a viris extremarum partium occisi sunt. Imagines effusae in interreti vehicula captivis onusta ostendunt, deinde ipsos stratos, tandem Islamistas (ISIS, id est Res Publica Islamica Iraquiae et Syriae) ignitos globos in eos displondentes. Iam die Veneris primi nuntii de caede ab Ordine Nationum Unitarum vulgati sunt: XVII armis interfecti sunt a militantibus regionis “liberatae”; postea duces Islamistae palam declaraverunt se de Sciitis extremum supplicium sumpsisse, id est capite damnatos esse milites et adiutores regiminis adversi. De occisorum numero nihil pro certo habetur. In regione Tikrit renuntiatum esse circiter IV milia hominum captos ex quibus MDCC necati essent. Ignoratur num tot perierint.

Ex sententia factionis Sunnitae nullus locus Sciitis cedendus est; immo terrorem inferendo efficiunt ut adversarii ab amplis regionibus removeantur. Princeps Sciitarum quid sentiret exprompsit: in suam potestatem territores totam nationem redigere velle, qua re delectum virium securitatis habere necesse.

Praeses Obama nuper nuntiavit quodam modo Civitates Americae Unitas auxilium laturas esse sed nullas copias missuras: res intestinas esse.

Scripsit Lydia Ariminensis