Populares et socialistae praevalent...

... in senatu Europaeo, sed increscit numerus civium qui Unioni diffidunt.

Ex DCCLI senatoribus a populis Europaeis electis, CCXIII factionibus popularibus favent, qui clade afficiuntur LX sellis amissis; CXC sunt socialistae, qui vim pristinam servant. Hos duos maximos greges putant observatores foedus icturos esse, ut Collegio et Senatui una praesint. In Germania Christiani democratici triumphant, in Italia Factio Democratica, Unionis Europaeae fautores.

Sed in Regno Coniuncto Factio Libertatis UKIP, in Francogallia Frons Nationalis, in Dania Factio Popularis, in Hungaria Factio ad Meliorem Hungariam JOBBIK, in Graecia Aureum Diluculum (Chrysé Augé) amplo consensu afficiuntur, Unioni vehementer hostiles, metum incolarum colligentes ob increscentem numerum immigrantium et profugorum. Factiones sinistrae in Graecia et Hispania suffragia ultra exspectationes obtinuerunt.

Si talibus nuntiis addas, secundum quemque civem Unionis comitiis interesse noluisse, Europae gubernatoribus colligitur necnon Argentariae Europaeae haud pauca neque minima commutanda esse, si modo Unionem communem solidiorem exstruere velint.

Scripsit Herimannus Novocomensis