De lege Islamica...

... in regnum Brunei imposita

Kalendis Maiis Sultanus regni Brunei in insulam Borneum inserti Hassanal Bolkiah codicem scelerum et poenarum Islamicum pertulit: ex hac re efficitur, exempli gratia, ut sontes criminum minoris ponderis verberentur, furibus artus exsecentur, adulteri et homosexuales lapidibus obruantur. Quod decretum est cum societates totius orbis ad iura hominum defendenda vehementer restitissent. Sultanus cuius potestas a Deo data esse putatur, cui ingentissimae divitiae sunt, perceptis fructibus a petroleo, sexaginta septem annos natus, in dies magis magisque deditus religioni est. In regno septuaginta cives ex centum Mahometani Sunniti sunt; reliqui Sinenses, Anglicani, Catholici. Lex Corani, ut videtur, etiam iisdem imponetur. Iam episcopi timent ne baptizare possint.

Sultanus Bolkiah leges Islamicas suum regnum defensuras esse putat a malis moribus exterarum nationum, qui per interrete quocumque terrarum vulgantur. Codex ex lege Corani tribus temporibus imponetur: primum pecunia multabuntur et in carcerem sontes turpium morum conicientur, si filios genuerint extra matrimonium, nisi in templum die Veneris adierint. Deinde damnati furti vel rapinarum, omnibus spectantibus, verberibus excruciabuntur vel eorum manus amputabuntur. Tum demum rei adulterii et homosexualitatis usque ad mortem lapidibus obruentur. Reclamationes frustra exortae sunt; inanes adhortationes ad opus intercludendum in innumeris deversoriis sultani toto orbe sparsis: nimiae divitiae superbissimum dominatum permittunt. (Sumptum a Corriere.it 5/05/2014)

Scripsit Lydia Ariminensis