In Ucraina res ad summum discrimen venit

Tumultu in Ucraina orientali continuato gubernatores de militibus mittendis cogitant, ut „territores“ coerceantur. Alexander Turtshinov praeses in oratione per televisionem emissa dixit sanguinem iam esse perfusum in " bello, quod Russi cum Ucrainia gererent". Ita seditionem in regionibus orientalibus magis magisque augeri. “Russis non concedemus”, inquit, “ut ea, quae in Chersoneso gesta sunt, in Ucraina orientali repetantur.”

Simul reclamantibus pollicitus est eos fore impunitos, si ad Lunae diem sponte arma deposuissent. Id quidem non ad eos pertinere, qui iam custodes publicos essent aggressi. Russi de ea re indignati responderunt iussum praesidis esse sceleratum, cum exercitu adhibito reclamationes reprimere vellet. Se id agere, ut res, quae nunc gererentur, ab institutis internationalibus, velut a Consilio Securitatis, inquirerentur. Ex civitatibus occidentalibus nunc pendere, quomodo bellum civile in Ucrainia evitaretur. Id opus esse, ut res publica funditus reformaretur; cui proposito scilicet gubernatores Ucrainiani vehementer repugnant. 

Ban Ki-Moon, secretarius generalis Nationum Unitarum, sollicitissimus de tanto rerum discrimine, utramque partem monuit, ut rem sedarent , ius observarent, omnibusque rebus se abstinerent, quibus periculum augeretur. Iam antea Sergius Lawrow, minister Russus rerum exterarum, monuerat, ne vi militari adhibita consilia pacis periclitarentur:  dies Iovis erat constitutus, ut legati Russorum, Americanorum, Unionis Europaeae, Ucrainae de pace agerent. Sed Americani Russos insimulant seditionis incitatae. Samantha Power, legata Americana ad Nationes Unitas „quae hic geruntur“, inquit, „simillima sunt rerum in Chersonesio gestarum. Hi tumultus non sponte sunt exorti, sed consilio Russorum.“

Scripsit Volfgangus Austriacus