Ucrainae senatus

... praesidem munere removit

Die 22 mensis Februarii Ucrainae senatus Praesidem Yanukovich potestate privari decrevit, cum eum accusaret quod iura hominum violasset, simulque Juliam Timoshneko, priorem Praesidentem e carcere dimitti. Sub omnium oculis adhuc sunt proeliorum horrendae imagines quae commissa sunt in foro Libertatis urbis capitis Kiev, ubi reclamantes et custodes publici inter se conflixerunt: circiter centum perierunt, quingenti saltem vulnerati sunt. Post caedem Praeses Ucrainae Yanukovich reclamationibus cesserat et foedus fecerat cum partibus adversis, deinde evanuerat. Alteri Yanukovich in urbem Kharkiv, apud Russiae finem, presidium suarum partium confugisse opinati sunt; alteri eum in quandam exteram nationem discedisse. In eadem urbe interea e custodia dimissa est Julia Timoshenko; turba hilaris ad carceris portas clamans “Te exspectamus” concurrerat.

Reclamantes opulentissimam sedem, non longe ab urbe capite, praesidis expulsi occupaverunt; si perspexeris quomodo exstructa sit, quam lauta, quantum pateat, quot partes et munera sive aedificiis sive hortis agrisque, domibus regiis imperatorum antiquitatis Romanae comparare poteris.

Nunc adversatorum factio imperium sumpsit: nova suffragia ad novum Praesidem eligendum indicta sunt ad diem 25 mensis Maii. Plurimi administri et senatores regiminis deiecti evanuerunt. Exercitus et custodes publicae securitatis se populo servituros declaraverunt. Victi et victores concordes clamaverunt : “Gloria sit Ucrainae!”

Hodierno die publice Arsen Abakov, administer negotiis rei publicae praepositus, munere ad tempus dato, enuntiavit Praesidem amotum comprehendendum esse; tamen ignoratur quo ille se contulerit.

Scripsit Lydia Ariminensis