Putin Volgogradiam visit

Vladimirus Putin, praeses Russiae, Volgogradiam visit, in urbem caedibus ac terrore vexatam. Se de bello territorum cum magistratibus urbanis communicare velle; scelera atrocia, quae commissa essent, nullo modo excusari posse.

Iam in oratione novo anno ineunte habita Putin territores exstinctum iri minatus erat. Putin locum quoque petivit, ubi Lunae die diruptione in laophorio publico facta multi homines perierant. Quo loco cum rosarum fasciculum deposuisset et cum civibus collocutus esset, nosocomium urbanum petivit, ut eos visitaret, qui per has insidias graviter vulnerati erant. His duobus ictibus, quorum alter Solis die in statione ferriviaria, alter Lunae die in laophorio publico factus erat, XXXIV homines caesi, LXXII vulnerati sunt.

Sunt, qui timeant, ne plures ictus sequantur: nam islamistae Caucasii, qui auctores insidiarum habentur, iam antea praenuntiaverant se ludos Olympicos, qui in ea regione agerentur, omnibus modis prohibere velle.

Scripsit Volfgangus Austriacus