Annus
2 0 1 2

ACADEMIA POESEOS ITALICA

ACADEMIA POESEOS ITALICA

 

E. I. P. ITALIA Schola Pacis Instrumentum studiosis, cultoribus et discipulis

 

CERTAMINA VICTORIUM TANTUCCI ET SCEVOLA MARIOTTI

 

POESEOS LATINAE CERTAMEN II PROPONUNT

 

Certamen apud Universitatem Pontificiam Salesianam magna cum solemnitate pridie Id. Apr. a. MMXIII celebrabitur. Certamen Linguae Latinae studium nec non loquendi scribendique vim ac pertractationem favet; perennes insuper rerum humanarum respicit quaestiones, quae ut antiqua excitaverunt ingenia ad carmina Latine contexenda ita recentiores vel nostrae aetatis poetae continuo sollicitant. Certamen insuper studiosos, cultores et discipulos, ut carmen vel opusculum de quodam Romanorum poeta Latine conscribant, adducit.

 

Certamen in duas partes dividitur, quarum prior, Victorio Tantucci dicata, gymnasiorum lyceorumque discipulis proponitur

 

Nam Victorius Tantucci praeclarus illius linguae Latinae grammaticae auctor fuit, quae sexaginta iam annos est vel apud Italos vel apud externas gentes plurimi ducta.

 

Omnibus gymnasiorum lyceorumque sive Italicorum sive externarum gentium petitoribus, qui Certamini V. Tantucci interesse cupiant, haec sunt observanda praecepta: scripta, sive astricta sive soluta oratione, Latine omnia exarentur; scripta, quae prosa oratione exarantur, summum centum triginta verba, minimum centum complectantur; poetarum fetus ne minus XXV versibus constent neque numerum XXV versuum excedant; petitor opus suum, machinula scriptum vel computatro, in ima pagina nomine et cognomine notet; addat insuper domicilium, telephonii numerum, cursum electronicum lyceique titulum; unusquisque petitor quinque operis exemplaria mittat.

 

Petitoribus haec praemia tribuentur: qui inter omnes victor euaserit, diplomate et trecentis eurinummis honestabitur; qui victori proximo discesserit, diplomate et ducentis eurinummis decorabitur. Qui tertio erit praemio dignus ductus, publica laude tantum ornabitur. Omnibus victoribus per diploma credita scholastica merent.

 

Unumquodque Lyceum discipulorum opera, qui praemio V. Tantucci interesse cupiant, intra Id. Martias a. MMXIII ad Universitatem Pontifciam Salesianam, ut est infra scriptum, mittenda curent. Quod sigillum cursuale clarum testimonium praebet.

 

In involucro praemium index, cui opus interfuturum sit, notetur.

 

Altera certaminis pars, Scaevolae Mariotti dicata, linguae Latinae cultoribus et studiosis proponitur

Nam Scaevola Mariotti, quod neminem latet, praeclarus apud Studiorum Universitatem La Sapienza philologus fuit; una cum Aloisio Castiglioni Lexicon Linguae Latinae edidit.

 

Omnibus petitoribus haec sunt observanda praecepta: scripta, sive astricta sive soluta oratione, Latine omnia exarentur; scripta, quae prosa oratione exarantur, summum ducenta uerba, minimum centum et quinquaginta complectantur. Argumentum ad philologiam pertinens ipsi sibi seligat petitor; poetarum fetus ne minus octoginta versibus constet neque numerum centum versuum excedat; petitor, ubicumque terrarum est, quinque operis sui exemplaria, ad unum tantum argumentum pertinentia, machinula scriptoria vel computatro exarata, intra Id. Mart. a. MMXIII ad Universitatem Pontificiam Salesianam, ut infra scriptum est, mittenda curet. Quod sigillum cursuale clarum testimonium praebet. Petitor opus suum in summa pagina sententiola notet, quam super involucrum, in quo scidula nomen et cognomen nec non domicilium, cursum electronicum claudetur, grandioribus litteris exarabit; petitor denique curet, ne nomen super involucrum exterius exaret. Id si faciat, excludetur.

 

Qui victor evaserit, diplomate ornabitur et trecenti eurinummis tribuentur

Roma a. d. V. Kal. Nov. a. MMXII.

Lina Sergi Lo Giudice - Anna Paola Tantucci

 

Certamen di Poesia Latina

Università Pontificia Salesiana

Piazza dell’Ateneo Salesiano 1-00139 Roma

Pontificium Institutum Altioris Latinitatis

Facoltà di Lettere Cristiane e Classiche

Università Pontificia Salesiana

Piazza Ateneo Salesiano 1

00139 Roma

Tel.: +39 06 87290260

Fax: + 39 06 87290397

Certaminis praecepta publicabuntur etiam apud

www.eipitalia.it

www.latinitas.unisal.it

www.istruzione.it

Horatius Antonius


DE PONTIFICIA ACADEMIA LATINITATIS

De Pontificia Academia Latinitatis

Saturni die X mensis Novembrus Benedictus XVI motu proprio condidit Pontificiam Academiam Latinitatis ad fovendam diffusionem et cognitionem linguae Latinae; cuius institutionis Praeses nominatus est Ivanus Dionigi Professor et Rector Universitatis Bononiensis, Pisaurensis, docens Litterarum Latinarum, Secretarius Dominus Robertus Spataro qui docet Litteras Christianas Antiquas Graecas apud Universitatem Pontificiam Salesianam. Quo consilio capto satis constat ex litteris Apostolicis motu proprio datis Pontifici cordi esse “ut linguae Latinae altius cognoscendae eiusque congruenter utendae fulciatur cura, sive in ecclesiali sive in patentiore cultus campo”.

Quamquam a Pentecoste Ecclesia omnibus linguis locuta est, tamen Graece ac Latine primi Christiani inter se communicaverunt sermonibus omnibus cognitis. Subverso imperio Romano, lingua Latina perrexit in opera Theologiae, Liturgiae, Patrologiae, in ius Canonicum. Qua re etiam nostra aetate “Latinae linguae cultus et cognitio perquam est necessaria ad fontes vestigandos ex quibus complures disciplinae ceteroqui hauriunt”. Cum in cultu hodierno studia humanarum litterarum neglegantur, in nostro orbe non solum scientia et technologia locum habent sed etiam renovatum studium quod exerceatur apud instituta ecclesiastica nec non in nationibus quibus radices Graecae et Romanae desint, immo adtineat ad iuvenes quibus cultus et mores omnino diversi ac nostris sint.

Scripsit Lydia Ariminensis

Lydia Ariminensis


DE COLLOQUIIS LATINIS CONVENTUS BENACENSIS

De colloquiis Latinis conventus Benacensis

In oppidulo Sancto Felici apud Lacum Benacum nonus conventus a collegio “Europa Latina” paratus est de lingua Latina instituenda.Primum tamen aliqua de “Europa Latina” explicanda sunt. Qua de re agitur? Pactum est interretiale inter VIII Lycaea Longobarda et Veneta confectum ex incepto docentium linguae Latinae et Graecae quibus propositum est artis didacticae renovandae praesertim de Latina. Cur nostro tempore Latine discendum et loquendum? Discipulos hodiernae aetatis plerumque taedet huius studii quod inane et difficilius putetur. Non tantum scriptores antiquitatis tractandi sunt: novisse Latine efficit ut uberrima rerum cognitio teneatur, utque sententiae intelligi possint aetatis modernae praeclarorum physicorum et philosophorum inter quos Erasmus, Copernicus, Galilaeus, Newton, Cartesius, Spinoza, Hobbes qui, cum ceteris magnis viris, Latine scripserunt. Quis est autem qui ignoret linguam Latinam usque ad XVIII saeculum doctos totius Europae inter se iunxisse? Qui Latine sciat, ei attingere licet verborum thesauros philosophiae, litterarum, disciplinarum mathematicarum et disciplinarum experimentis nixarum, immo etiam technologiae ex qua adhuc verba nova Latine interdum creari solent. Praeterea non neglegendum est quotannis ab “Europa Latina” certamen parari quod pertineat ad “opera post imperium Romanorum eversum conscripta”: excerpta scriptorum ab alteris discipulis Italice, ab alteris Latine, vario modo, explananda et commentanda sunt.

Quo modo renovanda est linguae Latinae institutio ut studium accomodatius ac praesentius reddatur? Ad quae sedulus grex Latinitatis cultorum spectat? Primum magistrorum conformationi ad tempora praesentia et ad novas doctrinas, conventus duorum ac trium dierum parans, favere vult, deinde usus et cognitionis linguae Latinae incremento, participes didacticae reddens non solum omnium disciplinarum magistros sed etiam discipulos parentesque communicatione interretiali adhibita.

Tres dies, a die III ante Kal. Oct. ad Kal. Oct. eximius professor Aloisius Miraglia, docens Academiae Romanae cui nomen est est Vivarium Novum in coetu adfuit. Quod praecipuum est, apud Academiam discipuli excepti sunt qui a toto orbe conveniunt ut Latine et Graece summo studio discant: hoc anno quadraginta, omnes prope ducenti numerantur. Quotannis peritissimus magister colloqui solet cum docentibus magnam partem Longobardis de disciplina linguae Latinae renovanda. Methodus “Natura” vel Orbergensis nominata est ratio docendi quae explicatur ab eximio magistro in libris inscriptis “Familia Romana” et “Roma aeterna” domus editoriae “Vivarium Novum”; ex qua grammaticae praecepta percipiuntur a plurimis fabulis lectis, facilioribus initio redditis, quarum verba et iuncturae paulatim memoriae a discipulis mandantur; amplius discitur Latine colloquendo vel, ut ostentum est a magistro in coetu, actioni scaenicae aptando textus in magnum album translatos ab archivis computatri. Praeter alia, quoad interesse potui, professor Miraglia, colloquendo cum magistris Lycaeorum peritissime Latine disseruit de scriptoribus aetatis mediaevalis et modernae. Nam, ut supra diximus, index optimorum scriptorum augendus est, aliis inclusis quae post antiquitatem fuerunt.

In conventu non neglecta est ratio linguam Graecam docendi: magister Gherardus Guzman, qui iam fuit Aloisii discipulus , praecepta grammaticae Graecae descripsit et explicavit fluentissime Graece loquens ac locos sumptos ab "Athenaze” proferens, quod opus eundem methodum Orbergensem repetit.

Scripsit Lydia Ariminensis

Lydia Ariminensis


Septimanae Latinae nostrae appropinquant. Restant aliquot dies, quibus inscriptionem pro Septimana Latina accipi dixeramus. Hoc anno, ut iam scitis, duae fient, et Amoeneburgi apud Marburgum et Frisingae prope Monachum in Germania.

Cum Septimana Latina Amoeneburgensis iam omnino plena sit, Frisingae adhuc nonnullos participes accipere possumus. Omnes ergo ii, qui desiderant Septimanae Latinae interesse, se proximis diebus inscribant oportet. Etiam Frisingae vero loci liberi iam pauci sunt. Si plura comperire voletis, adite paginam nostram interretialem, quae est haec: http://www.septimanalatina.org

DE PROXIMIS SEPTIMANIS LATINIS

Plerosque vestrum iam de proximis Septimanis Latinis Europaeis certiores fecimus. Numerus locorum liberorum Amoeneburgi iam exiguus est. Frisingae autem adhuc participes accipiuntur. Valde quidem gaudebimus, si primae Septimanae Latinae Frisingensi intereris. Ibi nonnulla instituemus, quibus studium tuum excitari putamus: Excursiones fient et Monachum, ubi Thesaurum Linguae Latinae visere in animo habemus, et Ratisbonam, quod oppidum praeter relicta Romana abundat aedificiis mediaevalibus. Die Veneris exspectamus professorem Valahfridum Stroh, auctorem libri praeclari "Latein ist tot, es lebe Latein!", qui de Iano Novák musico Latinissimo referet.

Prima Septimana Latina Europaea Frisingensis instituetur a die 2 ad diem 8 mensis Septembris. Si interesse in animo habes, mitte nobis quaesumus inscriptionem usque ad diem XV mensis Iulii. Omnia quae ad Septimanas Latinas pertinent, hic invenietis: http://www.septimanalatina.org

DE LIBRIS NOSTRIS NOVIS

Tandem methodus nostra Latina renovata et denuo divulgata est, cui titulus nunc est SEPTIMANA LATINA. Sunt quidem duo volumina, quorum primum textus et imagines continet, secundum autem exercitationes, grammaticam, vocabula. Plura de SEPTIMANA LATINA hic comperietis: http://www.septimanalatina.org/txt/l/libri.html Si libros nostros accipere apud bibliopolam vobis non contigerit, nuntium quaesumus mittite nobis!

Speramus fore, ut vos hoc anno Frisingae vel Amoeneburgi salutare possimus.

Optime valete!


Ericus Palmen

Ericus Palmen

A Belgica per Gaium Licoppe et Paulum Kangiser didicimus Ericum Palmén mortuum esse, illustrem et doctissimum cultorem et vulgatorem Finnicum linguae Latinae, cui multum nos Ephemeridis scriptores debemus. In Vicipedia haec pauca invenimus, praeter eius longum librorum indicem:

Doctor Ericus Palmén (Finnice: Erkki Palmén), natione Finnus, est scriptor latinus hodiernus. Die XXVIII mensis Novembris anni duodebismillesimi dissertationem Latinam publicae censurae subiecit cui titulus: "De adverbiis pronominalibus localibus Latinis studia syntactica et semantica."

Cum erat lector linguae latinae in Universitate Granivicensi sive Jyväskyläensis, edidit cum aliis librum cui titulus "Ad Fontes". Scripsit in variis commentariis Latine, praecipue in Melissa. Palmén est lector emeritus linguae Latinae apud universitatem Jyvaeskylarum.

Ego Herimannus animo motus haec incitamenti verba relego ex privatis litteris cum Erico habitis, cum Ephemeris nondum edebatur:

Forte fortuna in singulos annos crescit eorum numerus, qui intellegunt institutionem Latinam esse rem potius dynamicam quam staticam: non obstinate in solis veteribus rationibus didacticis perseverare oportere, sed unicuique nostrum coniunctis viribus in eas aliquid novi afferendum esse, quo efficacius adulescentes ad studia Latina excitentur. Hodie LATINITAS, quae in civitate Vaticana divulgatur, haudquaquam sola est ephemeris Latina; inter alias commemorari debent VOX LATINA Saravipontana ac MELISSA Bruxellensis, per quas ambas lectores certiores fiunt de "Feriis Latinis" et seminariis vivae Latinitatis quotannis instituendis (plerumque singulas septimanas duraturis). Fortasse aliquando in tali seminario conveniemus et varias res inter nos Latine communicare poterimus! Cura, ut Latinissime valeas! ERICUS.

Granivici sive in urbe Jyväskylä a.d.XI Kal.Mart. anno MMIV

Tu quoque in altero mundo, Erice!



Retro ad:

Novissima editio
Summum paginae