Domus mobilis

(Mobile home - Belgica - Gallia - Luxemburgum MMXII)

Pellicula filmica Francisci Pirot, cuius partes maximi momenti agunt Arthurus Dupont (Simon) et Vilelmus Gouix (Julien).

Haec lepidissima fabula primum Locarni (ubi Certamen Cinematis his diebus fit) magna cum spectatorum voluptate demonstrata est; quam speramus in omnibus orbis civitatibus post breve tempus aspiciendam esse.

Ad domum parentum, in parvo Belgico vico, redit Simon, sponsae et operae stomachatus; cum amico iuventae suae Juliano constituit sese demum ex iugo familiari liberandum et novas vivendi rationes experiendas esse. Ideo patre decepto raedam habitabilem sibi comparat et ad iter se cum sodali parat sed... varias ob causas haud longe a domibus suis diu consistere debent. Aliquot septimanis in tali dubio peractis Simon solus profecturus est.

Exilis narratio, subtilis tamen descriptio sempiternorum adolescentium (XXX annom agentium!) nostrae aetatis: qui inter studium periculosae libertatis et aureum carcerem domesticum iactantur, ignotis rebus illecti earumdemque pavidi, avidorum parentum amplexus cupidi et fastidiosi. Amborum patres et Simonis mater nolunt enim liberos vias a se ipsos decretas peragrare, vitam suam occidentem in filiorum oboedientia reponentes. Juliani mansuri pater domus suae tectum magno cum periculo solus reparare coepit, ut filium ad manendum inducat.

Fabula tam leviter et grate narratur, ut saepe spectator ad amare subridendum inducatur, praesertim de duorum actorum amoribus; ex quibus has duas sententias excerpo.

Puella: "Idem volo facere ac vos, abire ut quis sim cognoscam." Simon: "Nos vero pro certo habemus, qui simus!"

Scripsit Herimannus Novocomensis