De Victoria Samothracia reficienda

Post opus Leonardi Vinciani refectum, id est tabula lignea Sanctae Annae, Musaeum Louvrianum celeberrimam Victoriae Samothraciae statuam restituturum erit, quam maxime visitatores admirari solent veluti Venerem Mili. Privati, plerumque Americani, qui iam tres milliones euronum donaverunt, pecuniam suppeditabunt ad opus reficiendum. Restitutio VI saltem menses proximo anno prosecutura erit.

Marmor album simulacri clarissimi constanter expositi apud Musaeum Louvrianum, luteolum factum est et umbrae prorae caeruleae in qua consistit, in ferrugineas, cum nonnullis rimis, conversae sunt. Victoria XVII saxis marmoreis insidet navis prorae imaginem effingentibus sed a pavimento consurgit in VI partes diviso. Etiam fultura et basis lithocollaris exstructae ad effigiem extollendam anno MCMXXXIV nonnullas scissiones ostendunt.

Simulacrum inventum est anno MDCCCLXIII a Carolo Champoiseau, consulari, archaeologiae cultore, Samothracae, in maris Aegaei insula sed e peritorum sententia pretioso marmore Pario fictum esse Rhodi a Pythocrato existimatur, incerto anno, ineunte saeculo secundo a.Ch.n.. Incertum est qua re effictum sit; sunt qui putent Rhodienses votum pro victoria in pugna navali apud Side cum classe Phoenicia Antiochi III Syriaci socia, Magnis Deis Cabiris dicavisse; alii id dicunt imitationem antiquioris simulacri III saeculi a.Ch.n. fuisse. Dea victoriae alata olim V metra existimatur insurrexisse, nunc moles, transactis plurimis saeculis,satis sordida fragilisque ostenditur. Nec admiratio desiit. Ne celeberrimum opus diutius lateat neve a visitatorum visu amoveatur, sub omnium oculis forsitan in forma vitrea reficiatur.

Scripsit Lydia Ariminensis