Ut linguam Latinam hodiernam colamus

Hispanice loquentibus, qui Latine scribere solemus, liber est utilissimus cui titulus Diccionario Auxiliar Español Latino compositus a Iosepho Iohanne del Col, sacerdote Italo in Argentina multos annos vitam degente et docentiae dedito. Hoc opus, paginarum plus quam mille, a longo et fructifero labore ortum proponit sine timore Latinitatem vivam usurpare; sed profecto vocabularium quod classicum appellamus auctor maxime colendum putat, idcirco quod, ut titulus docet, id est dictionarium auxiliare ad Latine scribendum postea quam vocabulis aetatis Ciceronianae usi simus et vocibus hodiernis omnino careamus.

In opere conficiendo, Iosephus Io. del Col non solum multa opera hodierna vestigavit sed etiam multa dictionaria iam edita inspexit, eo consilio ut verba Neolatina iam bene excogitata praebere possit. Itaque possumus in unum volumen visum intendere nec multa dictionaria sub oculis habere ut Neolatine scribamus.

Praeterea liceat referre Iosephum Iohannem del Col multa alia opera de Latinitate Hispanice scripsisse, in quibus hic parvus liber nominandus est: ¿Latín Hoy? Ibi invenitur historia recentis Latinitatis, quae non sine quodam angore legitur sed etiam cum spe propter multa pro Latinitate argumenta atque incepta, praesertim quidem privata.

Ego iam in scribendo hoc Dictionario utor et vobis, Hispanice scientibus, fidissime id commendare audeo (José Juan del Col Diccionario Auxiliar español latino para el uso moderno del latín, Insituto Superior Juan XXIII, Bahía Blanca, 2007, ISBN 978-950-9771-34-5; inscriptio auctoris electronica: jjdc@juan23.edu.ar).

Scripsit Paulus Kangiser