Pius V Papa

Antonius Ghisleri natus est anno millesimo quingentesimo quarto (1504) in vico Bosco Marengo prope Alexandriam urbem in Italiae regione Pedemontana seu Taurinensi (Torino). Admodum pius ac simul magni ingenii puer quattuordecim annorum ingressus est Dominicanum ordinem Praedicatorum, in quo – studiis peractis – consecutus est sacerdotium, et postea compluria munera illi concredita sunt, addita praelatione generali in Ordine et munere inquisitoris seu custodis rei catholicae in partibus Comi (Como) et Bergomi (Bergamo).

Suburbicarius episcopus consecratus Sutrinus (Sutri) e Nepesinus (Nepi), mox pater cardinalis creatus est et munus obtinuit magni inquisitoris. Paulo post quam in Pedemontanam sedem Montis Regalis (Mondovì) translatus erat, anno millesimo quingentesimo sexagesimo sexto summus pontifex electus est et nomen Pii V sibi imposuit (cuius imago ab El Greco picta adposita est). Quemadmodum iam episcopus, ita etiam summus Ecclesiae pastor nihil minuit in observanda claustrali disciplina, etiam ad album habitum quod attinet Dominicanum cum albo pileolo – etiam voce ‘piuscula’ nominato –, qua re valde contulit ad stabiliendam vestem Romani pontificis, quae viget hucusque.

Ecclesia illi erat regenda tempore difficili. Incumbebat enim periculum Turcarum, qui elati erant multis victoriis relatis de Christianis exercitibus. Pio tamen papae V contigit unire principes catholicos in defendenda Europa Christiana, qua re ingens classis catholica ad Echinadas insulas (Lepanto) valuit navalem aciem Turcicam penitus frangere die septimo mensis Octobris anno millesimo quingentesimo septuagesimo primo. Exercitus autem terrestris vincendus erat saeculo fere postea prope Vindobonam operâ Polonorum duce ipso rege Ioanne III Sobieski.

Plane sciens, quam atrociter Elisabeth regina catholicos Anglos persequeretur, non potuit, quin illam excommunicaret, quamquam sciebat, quae sors obventura esset Ecclesiae in Insulis. – Intra vero ipsam Vineam Domini, implevit vota Concilii Oecumenici Tridentini, accurate edens uniformia Missale et Breviarium Romana, sed etiam Catechismum Romanum ad parochos, quo usi sacerdotes dilucidius atque profundius catholicam doctrinam exponerent fidelibus praesertim diebus festis et Dominicis.

Mortuus est die primo mensis Maii anno millesimo quingentesimo septuagesimo secundo (1 V 1572). Corpus autem eius in basilica sanctae Mariae ad Praesepe seu Mariae Maioris conditum est in capella sanctissimi Sacramenti.

Scripsit fr. Benedictus Huculak, OFM