Gobekli Tepe antiquissimum adhuc monumentum repertum

Longo tempore necesse fuit ut homines fabulas religiosas de origine mundi recusarent. Nam praehistoria generis humani est scientia recens quae praecipue originem suam ducit ab investiganionibus a Boucher de Perthes anno 1844 adhibitis qui juxta urbem Abbatis villam (Abbeville) in Francogallia septentrionali instrumenta silicea primitiva in lapidicinis reperuit jacentia cum ossibus animalium extinctorum. Paulatim varios gradûs evolutionis humanae descripti sunt et anno 1865 haec nova vocabula: palaeolithicum et neolithicum ab archaeologo anglo domino John Lubbock ficta sunt

Palaeolithicum sive aetas veteris petrae duravit quoad homines erant venatores sequentes greges mammuthorum et tarandorum aut viventes in speluncis. Illis temporibus crusta glaciei duo kiliometra praealta Europam septentrionalem tegebat et steppa frigida et sicca usque ad Proximum Orientem patebat. A 12 000 a. J.C., temperies calidior paulatim facta est , glacies diffusa est et multis plantis iterum florentibus, homines ad agriculturam se converterunt. Postea, secundum theoriam assuetam, populis crescentibus, urbes ortae sunt in quibus templa aedificata sunt ad nova numina colenda quae agriculturam tuerentur et sacerdotes creati sunt qui haec templa ministrarent.

Usque nuper res sic apud archaeologos se habebat et ratione logicâ uti videbatur postquam archaeologus australiensis Vere Gordon Childe qui placitis marxistis favebat anno 1925 vocabulum « Revolutio Neolithica » conceperat: i.e. primum accidit mutatio in nova ratione operum et frugum creandorum (in « modis productionis »  qui dicuntur) et technologiâ, secundum mutatio in ideologiâ (i.e. religione) facta est.

Sed mirum inventum abhinc 5 annis ab archaeologis germanis in Turcia septentrionali repertum est quod haec omnia in incertum revocat. In Gobekli Tepe (turcice : « mons umbilici ») inventi sunt adhuc 4 circuli tabularum petraearum in terra erectarum (media ratione 3 m. altarum et 9000 kl pendentium) et diversis animalibus (scorpionibus, vulpibus, leonibus, serpentibus etc…) exsculptarum. Monumentum plus minusve simile est illo clarissimo circulo petrarum erectarum nomine Stonehenge in Britanniâ meridionali sito. Sed si pars antiquissima illius monumenti anglici ante MMM annos a. J.C. facta est, aestimatio vetustatis (vel datatio) partium antiquissimarum Gobekli Tepe ostendit eas circa … 11 500 annos a. J.C. factas esse! Non solum hoc significat Gobekli Tepe esse antiquissimum monumentum totius orbis terrarum sed etiam ab hominibus aedificatum esse qui nondum vasa fictilia faciebant, nec animalia mansueta (capras ,oves, boves) pascebant, nec in domibus perennibus vivebant nec …praecipue agros colebant.

Plus quam 500 homines putantur per multa saecula ad Gobekli Tepe aedificandum laboravisse qui tantum carne dorcadum et granis cerealium insativarum vescebantur. Tantae molis erat tale condere templum! Situs archaeologicus est enim 20 metris altus et 9 hectaris explanatus, tamen circa 8000 annos a. J.C. sub ingenti tumulo terrae de industriâ sepultus est et sic integer posteritati remansit.

Cur et quomodo homines praehistorici « venatores carptores »  tam ingens monumentum facere potuerunt? Initio annorum 90 praehistoricus francogallicus Jacques Cauvin hanc thesim proposuit: novus deorum (vel dearum) cultus necessitatem hominibus attulit ut congregarentur ad caerimonias celebrandas et sic novas rationes ciborum adipiscendorum et laboris communis componendi invenire debuerunt. In hac regione Crescentis Fertilis per immensas areas jam nascebatur aliquod genus tritici primitivi quod, secundum investigationes recentes de ejus ADN, origo est omnium triticorum sativorum modernorum. Nunc putatur Agriculturam fortasse juxta Gobekli Tepe paulatim ortam esse quia homines novos ritûs facere cupiebant quorum participes ad hoc centrum religiosum e tota regione veniebant. Hoc significat aliquam mutationem conscientiae priorem quam mutationem technicam evenisse.

Adhuc difficile est dicere quae fuerint. Fortasse agebatur de primo sensu religioso collectivo ad multos populos et non tantum ad unam tribum pertinenti. Homo non tantum pane vescitur

Scripsit Marcus Provincialensis