Prudentia matutina

Omnibus fere plaudentibus, quidam grex indagatorum in Isräel, hominibus vero non modo drosophilis scrutatis, narrat eos corpore reddi tenuiore, qui tortam socolateam bene mane sumant. Sumpta enim ientaculo sescentorum caloriorum, quae dicuntur, e mille sescentis cotidianis, placenta haec famem arcere invenitur. De hormonte quidem temperando agitur quod ghrelin vocant, dulcia scilicet proteinis iuxta modum miscendo, ut minuatur cibi desiderium. Quod hormon usque nuper omnibus, adhuc compluribus penitus ignotum; licet vetus est illud ‘ientetur ut imperator’. Ad vivum tamen ne reseces adagium. Nonne Georgius Quartus summo mane esse olim aspectus est ‘duas columbas, tria copadia bubula, tres partes lagoenae vini Moselliani, unum poculum vini spumosi, dua Lusitanici, unum coniaci’? Qui unum intra annum, mortuus est. Quamquam non hoc tantum ipse peccare videtur, quod praetermisit et socolatam.

Scripsit fr. Thomas Crean