Cairo ex Aegyptiorum urbe principali – In Aegypto gubernantes et opponentes in dies implacabiliores inter se adversantur. Haec natio magis quam umquam antea est disiuncta: Ex unâ parte sunt praeses Mahumetus Mursius eiusque assectatores; ex alterâ parte oppositionales et iudices. Qui reclamant Mursio eiusque decreto, quo îdem potestatem sibi confirmavit magnam et iurisdictione maiorem.

Mahumetus ElBaradei dux oppositionis die Saturni declarationem constitutionis Mursianam appellavit „dictatoriam", recusat omne colloquium cum praeside rei publicae habendum. îdem vir praemio pacis Nobeliano honoratus cum aliis viris politicis oppositionis collocutus die Saturni: "Nullus" inquit „est locus colloquendi, si dictator, postquam decrevit rationes, quibus populum abominabiliter deprimat, dicit: ‚Conveniat inter nos, ut medium quiddam teneamus’. Se sperare factum iri "transitum sine detrimento", ne natio irrueret in „circulum violentiae vitiosum".

îdem vir septuagenarius habetur pro uno ex motûs Aegyptii democratici ducibus. ElBaradeius iam postquam decretum Mursianum recitatum est, friguttiverat¹: "Mursius hodie totam potestatem rei publicae sibi arripuit seque ipsum fecit novum Aegypti pharaonem."

Iudices adhortari, ut fiant totâ in terrâ operistitia

Praepositus civitatis die Iovis decreto suo complures res a iurisdictione statutas neglexerat. Lêge enim constitutioni additâ sanxerat, ne res a se „ad revolutionem servandam decretas" iure possent recusari. Mursius etiam declaravit non iam licere dissolvere congregationem constitutionis, in qua praevalent islamistae. Praeterea praeses dimisit actorem publicum generalem Abdel Meguid Mahmoud.

Die Saturni res publica Aegypti in discrimen adducta est: Coetus iudicum Aegyptiorum, associatio iurisconsultorum magni momenti, omnes collegas monuit, ut totâ in terrâ opera intermitterent. Eadem organisatio die Saturni in sessione urgentissimâ Cairo in urbe factâ declaravit omnibus iudicibus actoribusque publicis opera esse intermittenda. Oportere, ut praeses decretum suum irritum faceret et actorem publicum dimissum ad officium revocaret.

Consilium iudicum supremum praesidi obiecit, quod iurisdictionis independentiam in periculum adduceret. In provinciis Alexandriâ et Damanhur et Al-Bahreia Arabicis mediaminibus testibus numerosi iudices opera sua iam intermiserunt. Iidem declaraverunt non fore, ut ab operistitio suo desisterent, antequam Mursius declarationem constitutionis irritam fecisset.

Talat Ibrahim Abdullah novus actor publicus generalis nullum dubium relinquit, cuius partis politicae ipse sit – iam persequitur eos, qui Mursium vituperent.

Gasum lacrimiferum in Plateâ Liberationis dispersum

Mursius die Veneris decreta sua defenderat et coram assectatoribus ante palatium praesidiale affirmaverat, se continuo laborare pro „Libertate et democratiâ". Compluribus in urbibus inter se colliserunt Mursii assectatores et adversarii. In urbibus Alexandriâ et Suez adversarii accenderunt aedificia Mursianae partis politicae Libertatis et Iustitiae.

Vituperatores Mursio obiciunt, quod îdem iam nunc plus potestatis habeat quam Husni Mubarak, qui mense Februario a.2011 honore praesidatûs deiectus est.

Statio nuntiorum emissoria, quae appellatur „Al-Arabija", teste ministerio valetudinis nuntiavit ex die Veneris totâ in terrâ reclamationibus violatos esse 140 (centum quadraginta) homines. Abul Ess al-Hariri, praesidens partis politicae Alligationis Socialisticae, dixit diurnariis ipsius "Al-Ahram Online" se suamque uxorem Alexandriâ in urbe a Fraternitatis Muslimicae grassatoribus graviter esse violatos.

Astyphylaces die Saturni in Plateâ Liberationis usi sunt gaso lacrimifero ad parvum gregem hominum manifestantium fugandum, qui deinde fugerunt in vias secundarias. Nonnulli oppositionis participes noctem degerant in viridario mediâ in Plateâ sito in 30 (triginta) ferê tentoriis versantes, ut reclamarent potestati a praeside sibi ipsi datae.

Propter res in Aegypto mutatas extra hanc quoque terram effecta est sollicitatio. Guido Westerwelle minister rerum externarum foederalis Mursium monuit, ut respiceret potestatum separationem. Se sperare „continuari processum, quo Aegyptus assequeretur democratiam, participationem socialem atque oeconomicam, potestatem iuris potestatumque separationem".

Fraternitas Muslimica assectatores suos adhortata est, ut hôc die Solis manifestent se consentire cum Mursio. Ut islamistae mâne congregentur in plateis urbium vicorumque Aegypti.