Bad Homburg et Neunkirchen ex oppidis – Vir 22 annos natus glaebâ terrenâ in stratam autocineticam 5 (quintam) prope oppidum Bad Homburg deiectâ gravissimê violatus est. Astynomi dixerunt eundem sedisse iuxta aurigam autocineti, quod nocte ante diem Dominicum telo ictum esset.

Autocinetum vehebatur sub ponte pedestri, cum subito homines ignoti deiecerunt lapides magnasque glaebas terrenas. Magna glaeba terrena in latere dextro per vitrum antiaerium percussa illisa est ad virum iuxta aurigam sedentem. Deinde auriga moderari non iam potuit autocineto, quod collidit cum regulâ viae stratae marginali et circumiectum constitit ad viae marginem.

Autoraedarius 20 (viginti) annos natus et puella 18 (duodeviginti) annos nata, quae sederat in sede posteriore, diaschisi levioribusque vulneribus affecti sunt. Convector a servatoribus in nosocomium est apportatus. Locutor astynomicus dixit eum virum accepisse gravia vulnera interiora. Idem vir 22 (viginti duos) annos natus die Dominico adhuc in periculo mortis versabatur.

Periculum mortiferum

Astynomia nunc conatur invenire quosdam autoraedarios, qui violatis auxilium tulerunt primum. Iidem dicuntur vidisse homines in ponte versantes. Ut astyphylaces et siphonarii et servatores post infortunium operari possent, strata autocinetica, quae ducit Francofurtum, a nocte usque ad mane diei Dominici per sex ferê horas erat obstructa.

Iam nocte ante diem Saturni homines ignoti res ponderosas deiecerant de ponte stratae autocineticae prope Neunkirchen – forte fortunâ tantum accidit, ut nemo violaretur. Astynomia rettulit autoplaustrum ictum esse integumento guletae^*, quam homo ignotus de ponte deiecisset. Integumentum, quod pondere erat circiter 20 (viginti) chiliogrammorum, vitro antiaerio alliso praeteriectum est, ut viri insedentes remanerent salvi.

Duo currûs sequentes etiam integumentum supervecti afflicti sunt. Etiam eorum aurigae manserunt integri. Autoplaustrarius in ponte viderat hominem veste nigrâ et thorace laneo caputiato indutum. Magna investigatio statim incohata frustra facta est. Astynomia nunc quaeritat auctorem homicidii attemptati.

Iulio iam mense eodem loco iniectum erat integumentum canalis in tectum autoplaustri transportatorii. Plaustrarius evaserat territus. Tempore praeterito variis in locis Germaniae foederalis iterum iterumque res ponderosae deiectae sunt de pontibus in stratas autocineticas.

At talis deiectio est periculum mortiferum. A.2008 (bis millesimo octavo) prope Oldenburgum quidam vir caudicem de ponte stratae autocineticae deiecerat. Caudice per vitrum antiaerium in autoraedam illiso mulier interfecta est iuxta aurigam sedens. Anno post vir homicidii damnatus est ad custodiam perennem.