Annus
2 0 1 2


13

d.13. m.Oct. a.2012, h.14:43

Eum mafiâ familiariter usum esse

Iaponiae ministrum iustitiae visitasse nuptias viri yakuzanorum participis

Decem tantum diebus postquam magistratum iniit, Keishu Tanaka Iaponiae novus minister iustitiae debet confiteri peccatum tempore praeterito commissum: se Yakuzâ, i.e. mafiâ Iaponicâ, familiariter usum esse – sed dicit se hoc fecisse inscium.

Ecce Tanaka Iaponiae minister iustitiae: "Doleo"

Hammaburgo ex urbeKeishu Tanaka novus minister iustitiae Iaponicus concessit se triginta annis ante visitasse nuptias cuiusdam viri Yakuzanorum participis. Se illo tempore fuisse convivam nuptiarum honorabilem, sed ante festum nequaquam scivisse sponsum esse sceleratorum organisationis participem.

Tanaka: "Si scivissem" inquit „illum esse membrum gregis Yakuzani, illuc non issem. Ab aliis illuc ductus demum animadverti illos esse membra gregis scelerati. Doleo me tales necessitudines habuisse." Hic casus antea a diurnariis cuiusdam ephemeridis patefactus erat.

Hac re patefactâ urgetur Yoshihiko Noda minister praesidialis, qui gubernationem suam modo demum permutavit. Oppositio, i.e. pars politica liberalis, Tanakae necessitudines dixit esse „incredibiles" et postulavit, ut minister a munere suo abdicaret.

Hanc relationem d.13.m.Oct., a.2012 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/ Titulus originalis est: „Mafia-Kontakt – Japanischer Justizminister besuchte Hochzeit von Yakuza-Mitglied"

 

 

Scripsit Nicolaus Gross



Retro ad:

Novissima editio
Summum paginae