d
d.13. m.Oct. a.2012, h.15:02
In Francogalliâ canem violenter abductum esse
"Aut dabis 30.000 eurones aut Kikius morietur "
In Francogalliâ quidam vir 29 (undetriginta) annos natus conatus est cane abducto alicui extorquere pecuniam: Voluit enim possestricem terrarii canis Eboracani (Yorkshire-Terrier) cogere, ut in statione quadam laophorica deponeret 30.000€ (triginta milia euronum). At extortore invito mulier certiores fecit astynomos.
Ecce Kikius terrarius canis Eboracanus violenter abductus
Hammaburgo ex urbe – Propter canem violenter abductum quidam vir in Francogalliâ damnatus est ad custodiam trium mensium cum spatio probationis. Praeterea extortor a iudicio Vesontionensi (Besançon) punitus est multâ 500 € (quingentorum euronum). Iudices enim pro certo habuerunt virum 29 (undetriginta) annos natum Kikio cane terrario Eboracano violenter abducto possestrici terrarii voluisse pecuniam extorquere.
Vir mense Martio epistulae possestrici missae inscripserat verba, q.s.: "Aut dabis 30.000 eurones aut Kikius morietur". Postulaverat, ut mulier pecuniam thecae impositam deponeret in quadam statione laophori. At mulier certiores fecit astynomos, qui extortorem deprehendit praedam suam colligentem.
Vir 29 annos natus confessus est se conatum esse extorquere pecuniam. At vehementer negabat se canem abduxisse. Se, cum audivisset hoc animal disparuisse, speravisse se solvere posse problemata sua pecuniaria. At iudices hoc non crediderunt – praesertim cum Kikius apparuit eo ipso die, quo vir e custodiâ perquisitionis est dimissus.
Hanc relationem d.13.m.Oct., a.2012 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/ Titulus originalis est: „Hunde-Entführung in Frankreich – „30.000 Euro oder Kiki stirbt""
Scripsit Nicolaus Gross
|
