Cantabrigia ex urbe – Difficile est socolatae resistere. Hoc videtur effici substantiâ, quae cerebro secernitur hôc cibo delicato aspiciendo et comedendo: encephalino substantiâ opii simili ratti inducuntur, ut immoderatê socolatam devorent. In periodico speciali, c.t. "Current Biology" scientistae referunt hôc neuropeptido in cerebro quodammodo mandatum effici, quod sit „Ede nunc!" et „Perge hoc edere!". Iidem putant verisimile esse hac substantiâ etiam in homine effici voracitatem enormem.

In experimento investigatores rattis apposuerunt magnas copias ecligmatum socolateorum¹. In relatione investigatoriâ haec referuntur: "Ratti statim coeperunt ecligmata degluttire et simul concentrationes encephalini in eorum cerebris mensuratae sunt altero et dimidio tanto maiores quam usitatae". Eo demum tempore, quo ratti desierunt devorare ecligmata socolatea, concentrationes intra 40 (quadraginta) dere partes horae minutas esse deminutas. E contrario aliarum substantiarium signalium concentrationes non esse mutatas.

Scientistae concentrationem substantiarum mensuraverunt microassulâ², quam implantaverunt rattorum corpori neostriato, quae est regio cerebri, quae solet referri ad motiones gubernandas.

Quasi homo voraret 3,6 chiliogramma socolatae

In altero experimento bestiarum corpori neostriato iniecta est parva copia encephalini. Tum ratti altero tanto maiorem copiam socolatae degluttiverunt quam solito. Investigatores referunt, si consumptus 17 grammorum ecligmatum socolateorum calculando transferretur ad hominem, homo devoraret 3,6 (tria – virgula – sex) chiliogramma socolatae.

At socolatam bestiis encephalino addito non melius sapuisse. Eas nihil voluisse nisi celeriter et multum devorarent. Hoc apparere modis agendi, quibus ratti indicent se bene habere, e.g. linguâ exsertandâ. In utroque experimento (et cum et sine dosi encephalini additiciâ – ratti pariter se gesserunt.

Alexandra DiFeliceantonio, investigatrix Universitatis Michiganiae in urbe Ann Arbor sitae dicit haec: "Valdê verisimile est encephalino non sôlum rattos, sed etiam homines incitari ad comesionem immodicam et morbosam". Etiam in homine cellulas cerebrales corporis neostriati dorsalis esse activas, si homines adiposi cibos aspiciant aut drogomanici videant alios drogomanicos drogas consumentes. Alexandra: "Cerebrum" inquit „videtur esse pluribus facultatibus, quibus nos incitet ad consumptum cuppediorum immodicum, quam usque nunc putavimus".