Îdem locutor dixit mulieres primâ luce collegisse cremia, cum aeroplanis peterentur. Multas mulieres esse vulneratas. In Mihtarlam capite provinciae postea aliquot decurias virorum ad arcas nonnullarum mulierum funebres magnis vocibus clamasse „Moriantur USA, moriantur Iudaei". Zewak diurnariis ipsius SPIEGEL ONLINE postea affirmavit homines a gubernatore iustitiam postulasse et vocasse verba, q.s. „moriantur USA".
Etiam puellas interfectas esse
Homines vulneratos in nosocomia esse allatos. Latif Kajumi, rector officii valetudinis huius provinciae, dixit septem mulieres curari. Nonnullas victimas non esse decem annis maiores natu.
Hamid Karsai praeses Afghanistaniae hoc infortunium condemnavit et in regionem misit gregem hominum, qui rem essent perquisituri. Ab Afghanianis nuntiantur octo homines civiles esse mortuos, septem violatos.
Cohors ISAFiana doluit rem factam esse, quinque aut octo homines civiles esse interfectos, ut rettulit agentura nuntiorum AFP. Impetum aerium factum esse, ut seditiosi in hac regione versantes impugnarentur.
Hagen Messer locutor NATOnis agenturae dpa dixit impetu interfectos esse 45 (quadraginta quinque) seditiosos. Addidit verba haec: "Accepimus impetu in gregem seditiosorum facto fortasse interfectos esse quinque octove homines civiles. At non possumus hoc affirmare."
Animos hominum esse excitatissimos
Gens Afghaniana iterum iterumque irâ incenditur propter victimas civiles, quae efficiuntur NATOnis impetibus. Hamid Karsai praeses Afghanistaniae cohortem ISAFianam compluries vehementer commonuerat, ut in impetibus faciendis evitaret victimas civiles.
Hoc infortunium factum est tempore maximê inopportuno: Nam sic quoque hôc tempore gentis animus excitatus est propter cinema illud anti-islamicum, quod confectum est in USA. Nam in mundo Arabico propter idem scopocinema1 facti erant tumultûs et reclamationes vehementissimae.
Diebus septimanae finalibus Talibani ter impetum fecerant in milites ISAFianos: Mâne diei Dominici vir Afghanianus veste astyphylacis uniformi indutus quattuor milites Americanos globulis sclopeti percussit, die Saturni impetu facto mortui sunt duo milites Britanni. Praeterea die Dominico extremistae islamistici in castris in provinciâ Helmand australi sitis, ubi versatur Princeps Henricus successor Britanniae regalis, interfecerunt duos milites Americanos; quod se fecisse ipsi enuntiaverunt, ut ulciscerentur contumeliosum scopocinema Mahumetianum.
