In attentatione magnâ contra castra Afghanistaniensia facta mortui sunt duo pedites Americani marini. Etiam Princeps Henricus successor regalis Britanniae in his castris versatus est, sed remansit integer. Talibani confessi sunt se fecisse hanc attentationem, quam appellaverunt „ultionem scopocinematis¹ contumeliosi".

Vassintonio et Cabulo ex urbibus – Aggressores nocte venerunt cum phractoclastris² et pyraulobolis³: Attentatio cruenta facta est in castris cohortium internationalium in Afghanistaniâ australi sitis. Itaque nocte interfecti sunt duo milites Isafiani. Hoc affirmatum est a locutore tutatricis cohortis internationalis ISAF.

Secundum relationes diurnariorum Americanorum interfecti sunt duo Americani pedites marini, alios milites esse vulneratos. 16 (sedecim) Talibanos in attentatione periisse. Attentatio facta est versus mediam noctem (secundum tempus locale).

Agentura nuntiorum Reutersiana nuntiat Talibanos confessos esse se hanc attentationem fecisse. Quod iam antea nuntiaverat BBC (i.e. Corporatio Radiophonica Britannica). Talibanos hac attentione ultos esse scopocinema^*** anti-islamicum in USA confectum, quo ex nonnullis diebus tumultûs effecti sunt in mundo islamico. Kari Jusuf locutor Talibanorum Reutersianis dixit "Hac re ulti sumus Americanos propter istud cinema".

Agentura nuntiorum Britannica (PA) rettulit Henricum Principem Britanniae (Prince Harry), qui iterum in Afghanistaniâ militans tempore attentationis in castrorum parte Britannica versaretur, mansisse integrum. Eundem unâ cum aliis militibus suae cohortis helicopteri pugnatorii Apacheani duobus ferê chiliometris remotum versatum esse.

Attentationem factam esse die successoris regalis natali

Attentatio facta est contra Castra Cervicis Coriaceae (Camp Leatherneck), i.e. partem Americanam castrorum a compluribus nationibus communiter adhibitorum, quae sita sunt in provinciâ Helmand. Fox News Americana statio emissoria teste locutore ipsius ISAF cohortis tutatricis nuntiavit aggressores usos esse phractoclastris et granatis et armis levioribus. Afflicta esse aedificia et tugurium aeroplanicum^4*** et complura aeroplana.

Locutor Castrorum Cervicis Coriaceae affirmavit hunc impetum factum esse. In haec castra saepius fiunt impetûs, sed raro tam vehementes quam hôc tempore.

Secundum relationem agenturae PA Princeps Henricus septimanâ proximâ praeteritâ die Veneris advenerat castrorum partem Britannicam, quae appellatur Camp Bastion. Brevi antea Talibani minati erant se impetûs facturos esse in Britanniae successorem regalem.

Princeps Henricus, tertius successor regni Britannici, qui hôc die Saturni diem suum natalem duodetricesimum celebrat, iam a. 2008 (bis millesimo octavo) ad Hindukusch flumen Afghaniense militaverat. At haec Henrici militatio Afghanistaniensis, quae oportuit esse secreta, cum a diurnariis nuntiata esset, finita erat. Nunc autem Princeps in Afghanistaniâ mansurus est per quattuor menses.