Offenburgo ex oppido – Duo fures cornuum rhinocerotis a iudicio officiali Offenburgensi damnati sunt poenâ custodiae trium et duorum et dimidii annorum. Uta (Ute) Körber iudicissa sententiam pronuntians dixit Britannos, qui essent 31 (triginta unum) et 29 (undetriginta) annos nati, damnandos esse gravis furti gregalis communiter facti. Poenam mensurans Uta Körber iudicissa ternis mensibus accusatorem publicum superavit.

Ambo viri, qui iam antea multa deliquisse actis indicantur, confessi sunt se mense huius anni Februarii cornua e „Ritterhaus" (Domo equitum) museo Offenburgensi surripuisse. Manifestum est eosdem participes esse "retificii" (ut aiunt) ubique terrarum operantium mercatorum rhinoceroticorum, quod dirigitur ab hominibus in Angliâ atque Hiberniâ versantibus. Alius iam secundum ius poenale ad iuvenes spectans damnatus iterum lîber est; mulier 36 annos nata facinoris particeps clam evasit. Mercatorum rhinoceroticorum deest vestigium vel minimum.

Unum cornu rhinocerotis habetur pretii esse 50.000 (quinquaginta milium) euronum. Farina talis cornûs in terris Asiae nonnullis habetur pro medicamento et aphrosidiaco. Totâ in Europâ ex annis iterum iterumque surripiuntur cornua rhinocerotis. Astynomi Europaeii ("Europol") illos mercatores dicunt similes esse „mafiosis".