09
d.09. m.Sept. a.2012, h.12:56
Mors in Franconiâ facta
Virum a venatore pro apro habitum esse
In Franconiâ factum est venatorium infortunium tragicum. Venator in tenebris virum 26 (viginti sex) annos natum pro sue fero habuit – virumque pectore globulo sclopeti percutiens interfecit.
Pulchrisilvâ (Schönwald) ex oppidulo – Quidam venator in Franconiâ virum pro sue fero habitum globulo sclopeti percussit. Astynomi nuntiaverunt virum illum 26 annos natum prope vicum Pulchrisilvam in tenebris praeteriisse agrum maydis, cum globulo transfoderetur. Venatorem 51 (quinquaginta) annos natum globulo sclopetario viri pectus percussisse. Medicus summae necessitatis arcessitus iuvenem non iam servare potuit. Die Lunae quidam locutor astynomicus: "Etiamsi opinamur" inquit „agi de infortunio et de re haud consulto factâ – istaec res est manebitque socors interfectio". Venatorem adhuc liberum esse, nullam esse causam eum comprehendendi. "Eum non bene se habere, postquam virum sclopetando interfecerit, sanê quivis homo facile animo fingat."
Hanc relationem d.09.m.Sept., a.2012 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/
Scripsit Nicolaus Gross
|
|
