Annus
2 0 1 2


De pilula anticonceptiva viris apta

De pilula anticonceptiva viris apta

Indagatores universitatum Americanarum Dana-Farber Cancer Institute et Baylor College of Medicine, pilulam anticonceptivam viris destinatam conficere sibi proponentes, progressum magni momenti in actis scientificis "Cell" nuntiant: se mixturam parvarum molecularum composuisse, qua mures facultatem procreativam ad tempus amittant. Medicamentum enim, JQI appellatum, muribus masculinis suppeditatum usque ad illorum testiculos permeat ibique fecunditatem inhibet, et crebritatem et mobilitatem cellularum seminalium deminuens: ergo rarius feminae ovum fecundandum attingitur.

Si masculis muribus pro chiliogrammate vivi ponderis cotidie per sesquimensem quinquagena aut centena milligrammata medicamenti JQ1 subministres - refert scriptum scientificum - celeriter decrescit facultas generandi; si tamen subministrationem intermittas, in pristinam condicionem restituitur fertilitas: non solum testosteroni confectio, sed etiam coitus et prolis generandae bona valutudo minime medicamento sumpto afficiuntur.

Inde sperant studiosi post paucos annos pilulam anticonceptivam per os sumendam salubrem et efficacem confectum iri, cuius effectus sua quisque voluntate quandocumque intermittere queat.

Scripsit Herimannus Novocomensis



Retro ad:

Novissima editio
Summum paginae