Res prosperae denuo in Europa?

Etsi pericula timoresque  adhuc Europaeos afficiant, tamen in extremo cuniculo lucescit; euro enim superstes fore putatur et nationes quae nuper prope decoctionem versabantur, nunc videntur convalescere:  Graecia, Hibernia, Italia, Lusitania, Hispania. Germania vero sese roborat et ultra Europam Status Uniti numeros meliores quam antea in mercando computat; Iaponia quoque quamquam terrae motu est vulnerata paulatim redintegratur.

In Europa harum rerum in Mario Draghi causa a plerisque ponitur; is enim Argentariae Centralis Europaeae praesidiatum gerit et euronum mille miliones per licitationes in mercatum nummarium apportavit; inde mercatores atque collocatores mediocri optimismo fruuntur, debitique tamen fiscalis chirographa Graeca, Lusitana, Hibernaque nondum audent accipere. Francogallia autem et Italia versuras agunt ut pecuniam maiore fenere debitam in ratas (Anglice: rates) minores vertant. Itaque res oeconomicae adversae videntur retentae, neque tamen superatae. Omnimodis inpraesentiarum putatur exitium argentarium in infirmioribus nationibus non esse venturum, atque Euronationibus esse Eurofiduciam ubique colendam.

Scripsit Paulus Kangiser